काठमाडौं । नेकपा एमाले संसदमा प्रतिपक्षको लाइनमा बसेको छ । दोस्रोपटक पुनर्स्थापित प्रतिनिधि सभाको पहिलो बैठकमा एमालेका प्रवक्ता तथा सांसद प्रदीप ज्ञवालीले आफूहरु प्रतिपक्षी दलको रुपमा रहने जानकारी गराए ।
तर, व्यवहारमा हेर्दा एमाले सत्तापक्ष हो कि प्रतिपक्षी दल हो छुट्याउन आममानिसलाई गाह्रो भइरहेको छ । प्रतिपक्षीको लाइनमा बसेको एमालेका सांसदहरु सरकारलाई समर्थन गरेका छन् ।
सरकारको पक्षमा मतदान गरेका छन् । र साथै दुवै पक्षमा नभएर तटस्थ पनि बसेका छन् । यसले एमाले पक्ष कि प्रतिपक्षी दल हो व्यवहारत् छुट्याउन गाह्रो भएको हो ।
आइतबार कांग्रेसका सभापतिसमेत रहेका प्रधानमन्त्री शेरबहादुर देउवाले मागेको विश्वासको मतको पक्षमा एमालेका २२ सांसदले मत जाहेर गरे । देउवा सरकारलाई विश्वासको मत दिनेमा एमालेका ओली समूहका ८ र नेपाल समूहका १४ सांसद रहे । नेपाल समूहका रहेर पनि देउवा सरकारलाई मत दिन नसकेका ११ सांसदले मतदान बहिस्कार गरे ।
मतदान बहिस्कार गर्ने नेताहरु नै प्रतिनिधि सभा पुनर्स्थापना र देउवालाई प्रधानमन्त्री बनाउन सर्वाेच्च अदालत पुगेका थिए । तर, लोकतन्त्रको सुन्दर पक्ष मानिने मतदानलाई बहिस्कार गरेर आफ्नो राजनीतिक भविष्य सुरक्षित गर्नतर्फ लागेका उनीहरु अहिले नेपाल र ओली दुवै समूहमा खुट्टा राख्ने प्रयास गरिरहेका छन् ।
गत असार २८ गते सर्वाेच्च अदालतले देउवालाई प्रधानमन्त्री बनाउन परमादेश र संसद पुनर्स्थापना गर्दै बैठक आह्वान गर्न दिएको निर्देशनपछि तत्कालीन विपक्षी गठबन्धन त्यागेर पार्टी एकतामा लाग्ने बताएको नेपाल समूह अहिलेसम्म मूल घर जान सकेको छैन ।
बरु गठबन्धनको बैठकमा सहभागी भएर संसदबाहिर सत्तापक्षको भूमिका नेपाल समूहले निभाइरहँदा संसदभित्र भने ओली समूह प्रतिपक्षीको भूमिकामा देखिन्छ ।
साथै आइतबार त नेपाल समूहले संसदभित्रै सत्तापक्षको भूमिका निर्वाह गरेपछि अहिले एमाले सत्ता पक्ष कि प्रतिपक्ष छुट्याउन आमजनतालाई सकस परेको हो ।
यद्यपि संसद बैठकमा एमाले प्रतिपक्षी रहेको प्रदीप ज्ञवालीले बताइसकेका छन् । यसर्थ एमाले प्रतिपक्षी दल भएर पनि उसका सांसदहरुले आफ्नो पार्टीको निर्णयभन्दा सत्ताको निर्णयलाई आत्मसाथ गरेको देखिन्छ ।
canadanepalबाट सभार
