काठमाडौँ । एमाले सांसद रामकुमारी झाँक्रीले प्रधानमन्त्री शेरबहादुर देउवालाई विश्वासको मत दिनु एमालेका २३ जना सांसदको कर्तव्य भएको बताएकी छिन् । उनले ट्वीटरमा आफ्नो धारणा व्यक्त गर्दै सो कुरा उल्लेख गरेकी हुन् ।
झाँक्रीले एमालेले संस्थागत निर्णय गरेर देउवालाई विश्वासको मत दिनुपर्नेमा जोड दिएकी छन् । ‘सकिन्छ नेकपा एमालेले संस्थागत निर्णय गरी फ्लोरमा बसेर विश्वासको मतको पक्षमा भोट हालौं । त्यसो गर्न सकिँदैन भने सांसदहरूलाई संसद्को पुरा कार्यकाल सञ्चालन गर्न हामी सबैले विवेक प्रयोग गरी पक्षमा भोट हालौं,’ उनको प्रस्ताव छ । एमालेले संस्थागत निर्णय लिएर देउवाको पक्षमा भोठ हाल्न नसक्ने भए सर्वोच्चमा गएका २३ जना सांसदले भने देउवाको पक्षमा मतदान गर्ने झाँक्रीको भनाइ छ । ‘त्यो पनि भएन भने हामी २३ जना निवेदककर्ताले भोट हाल्नु त हाम्रो कर्तव्य नै हो । हामीले विश्वासको मतको पक्षमा भोट हाल्नेछौं,’ उनको भनाइ छ ।
एमाले स्थायी कमिटीले भने देउवाको पक्षमा भोट हाल्ने सांसदहरू पार्टीमा नरहने निर्णय गरिसकेको छ । एमालेले देउवाको विश्वासको प्रस्तावको विपक्षमा मतदान गर्न पनि निर्णय गरेको छ ।
