खोटाङ । जिल्लाको दिप्रुङ चुईचुम्मा गाउँपालिकामा वडा बिभाजनको लागि मतदान सम्पन्न भए संगै टेम्माको पक्षमा १०० प्रतिशत मत खसेको जानकारी प्राप्त भएको छ ।
दिप्रुङ चुईचुम्मा गाउँपालिका–४ बतासे र दिपुङ चुईचुम्मा गाउँपालिका–७ टेम्मा विभाजनका लागि गत असार १० गतेको गाउँसभामा पेश भएको प्रस्ताव अनुसार आइतबार मतदान सम्पन्न भएको पालिकाले जनाएको छ ।
गाउँसभाको कुल सदस्य संख्या ३४ मध्ये टेम्मालाई विभाजन गर्ने पक्षमा ३४ मत खसेको छ । त्यसको विपक्ष र तटस्थमा कुनै पनि मत खसेन भने बतासेलाई विभाजन गर्नुपर्ने पक्षमा १५ र विपक्षमा १९ मत खसेको छ । तटस्थमा भने मत खसेन । बतासेलाई साविकको बतासे–१, २, ३ र ४ लाई समेटेर एउटा वडा तथा साविकको बतासे–५, ६, ७, ८ र ९ लाई समेटेर अर्को वडा बनाउन प्रस्ताव गरिएको पालिका अध्यक्ष भुपेन्द्र राइको भनाई रहेको छ ।
बहुमत नपुगेकाले वतासेलाई विभाजन गर्ने प्रस्ताव गाउँसभाबाट अस्वीकृत भएको छ भने टेम्मा विभाजन भएसँगै दिप्रुङ चुईचुम्मा गाउँपालिकामा ८ वटा वडा हुने छ ।
स्थानीय सरकार सञ्चालन ऐन २०७४ को दफा ५ र ६ मा भएको व्यवस्था अनुसार साविकको टेम्मा–३, ५, ६ र ९ लाई समेटेर एउटा वडा र साविकको टेम्मा–१, २, ४, ७ र ८ लाई समेटेर अर्को वडा बनाउन प्रस्ताव पेश भएको थियो । देश पोस्टबाट सभार
