काठमाडौँ । नबिल बैंक लिमिटेडको ४२औँ वार्षिक साधारणसभाले सेयरधनीलाई १५.८० प्रतिशत लाभांश वितरण गर्ने प्रस्ताव पारित गरेको छ। बैंकका अध्यक्ष निर्वाणकुमार चौधरीको अध्यक्षतामा बिहीबार भद्रकालीस्थित त्रिभुवन आर्मी अफिसर्स क्लबमा सम्पन्न सभाले आर्थिक वर्ष २०८२/८३ को मुनाफाबाट पाँच प्रतिशत बोनस सेयर र १०.८० प्रतिशत नगद लाभांश वितरण गर्ने प्रस्ताव अनुमोदन गरेको हो।
साधारणसभाले अविमोच्य असञ्चिति अग्राधिकार सेयरधनीका लागि आठ प्रतिशत लाभांश दिने प्रस्तावसमेत पारित गरेको छ। सञ्चालक समितिको सिफारिस तथा नेपाल राष्ट्र बैंकको स्वीकृतिपछि आर्थिक वर्ष २०८२/८३ सम्मको सञ्चित मुनाफाबाट साधारण सेयरधनीलाई उक्त लाभांश वितरण गरिने बैंकले जनाएको छ।
बैंकका अनुसार प्रस्तावित बोनस सेयर वितरणपछि नबिल बैंकको चुक्ता पुँजी ३३ अर्ब ४० करोड रुपैयाँभन्दा बढी पुग्नेछ। बैंकले आर्थिक वर्ष २०८२/८३ मा सात अर्ब ९१ करोड रुपैयाँ खुद मुनाफा आर्जन गरेको जनाएको छ। स्थापनाकालको तुलनामा बैंकको चुक्ता पुँजी ९६० गुणाले वृद्धि भएको पनि बैंकले उल्लेख गरेको छ।
समीक्षा अवधिमा बैंकको निक्षेप परिचालन र कर्जा प्रवाहमा समेत वृद्धि भएको छ। अघिल्लो आर्थिक वर्षको तुलनामा निक्षेप दायित्व ६९ अर्ब ६७ करोड रुपैयाँ अर्थात् १३.०६ प्रतिशतले बढेर छ खर्ब दुई अर्ब ९३ करोड रुपैयाँ पुगेको छ। त्यस्तै, कर्जा तथा सापटी ५१ अर्ब ६८ करोड रुपैयाँ अर्थात् १२.१५ प्रतिशतले वृद्धि भई चार खर्ब ७६ अर्ब ८७ करोड रुपैयाँ पुगेको बैंकले जनाएको छ।
यसैगरी, आर्थिक वर्ष २०८२/८३ मा बैंकको वासलातको आकार १५.३८ प्रतिशतले वृद्धि भई सात खर्ब ३४ अर्ब ७६ करोड रुपैयाँ पुगेको छ। बैंकले वित्तीय कारोबार विस्तारसँगै संस्थागत सुशासन, ग्राहक सन्तुष्टि र आधुनिक बैंकिङ सेवालाई प्राथमिकतामा राख्दै आएको जनाएको छ।
साधारणसभालाई सम्बोधन गर्दै अध्यक्ष चौधरीले बैंकले देश, समाज, सेयरधनी, ग्राहक, नियमनकारी निकाय, कर्मचारीलगायत सम्पूर्ण सरोकारवालाको अधिकार र चासोलाई सम्मान गर्दै सन्तुलित ढङ्गले काम गरिरहेको बताए। उनले बैंकिङ सेवालाई आधुनिकीकरण तथा विस्तार गर्नुका साथै सामाजिक उत्तरदायित्वका क्षेत्रमा पनि बैंक सक्रिय रहेको उल्लेख गरे।
सभाको उद्घाटन कार्यक्रममा पहिलोपटक मौलिक संस्कृतिको प्रवर्धन गर्ने उद्देश्यसहित सांस्कृतिक प्रस्तुति पनि समावेश गरिएको थियो। साधारणसभाले संस्थापक सेयरधनीका तर्फबाट सञ्चालक समितिमा निर्वाणकुमार चौधरी, मलय मुखर्जी र सइद मन्सुर मुस्तफालाई निर्विरोध निर्वाचित गरेको छ।
