काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयन गर्न शुक्रबार बिहानदेखि मतदान प्रक्रिया सुरु हुँदैछ। मतदानका लागि महाधिवेशन प्रतिनिधिहरू बिहानैदेखि निर्धारित मतदान केन्द्रमा लामबद्ध भएका छन्। बिहान ७ बजेदेखि मतदान गर्ने कार्यतालिका तय गरिएपछि प्रतिनिधिहरू आफ्नो मताधिकार प्रयोग गर्न उत्साहका साथ मतदानस्थल पुगेका हुन्।
बिहीबार नै मतदान हुने भनिए पनि आवश्यक तयारी पूरा हुन नसक्दा प्रक्रिया शुक्रबारका लागि सारिएको थियो। मतदानको प्रतीक्षामा रहेका प्रतिनिधिहरू पुनः सक्रिय भएका छन्। विशेषगरी उपत्यकाबाहिरबाट आएका प्रतिनिधिहरू मतदान सकेर दसैँ मनाउन घर फर्किने तयारीमा रहेकाले पनि बिहानैदेखि मतदानस्थलमा चहलपहल बढेको छ।
निर्वाचन समितिका सदस्य सचिव राजु कटुवालका अनुसार प्रतिकूल मौसम, प्राविधिक कठिनाइ र मतदानमा लाग्ने समयलाई ध्यानमा राखेर निर्वाचनको समय परिवर्तन गरिएको हो। साँझ मतदान सुरु गर्दा रातिसम्म बस्नुपर्ने र प्रतिनिधिहरूलाई असुविधा हुने अवस्था देखिएकाले बिहानैदेखि मतदान गराउने निर्णय गरिएको उनले बताए। उनका अनुसार बिहान ७ बजेदेखि दिउँसो ३ बजेसम्म मतदानको समय निर्धारण गरिएको छ।
निर्वाचन समिति संयोजक वरिष्ठ अधिवक्ता प्रेमबहादुर खड्काले मतदानका लागि आवश्यक तयारी पूरा भएको जानकारी दिएका छन्। उम्मेदवारको संख्या धेरै हुनुका साथै विभिन्न पदका लागि छुट्टाछुट्टै मतपत्र आवश्यक परेकाले छपाइ तथा व्यवस्थापनमा समय लागेको उनले बताए। मतपत्रमा हस्ताक्षर गर्ने कामसमेत भइरहेको र त्यसका लागि ३२ जना वरिष्ठ अधिवक्ता खटिएको उनको भनाइ छ।
प्रदेशअनुसार छुट्टाछुट्टै मतदान केन्द्र
महाधिवेशन प्रतिनिधिहरूलाई मतदान गर्न सहज होस् भन्ने उद्देश्यले निर्वाचन समितिले प्रदेश तथा समूहअनुसार अलग-अलग मतदान केन्द्र निर्धारण गरेको छ। प्रतिनिधिहरूले आफ्नो नामावली र परिचयपत्र रुजु गराएपछि तोकिएको केन्द्रबाट मतदान गर्नुपर्नेछ।
निर्धारित व्यवस्थाअनुसार बागमती प्रदेशका प्रतिनिधिका लागि राष्ट्रिय सभा गृहको मतदान केन्द्र ‘क’ तोकिएको छ। कोशी प्रदेश तथा तराई–मधेस समूहका प्रतिनिधिले खुलामञ्चस्थित मतदान केन्द्र ‘ख’ बाट मतदान गर्नेछन्। गण्डकी प्रदेशका प्रतिनिधिका लागि हिमाल हल र मधेश प्रदेशका प्रतिनिधिका लागि तराई–मधेस हल तोकिएको छ।
त्यसैगरी लुम्बिनी, कर्णाली र सुदूरपश्चिम प्रदेशका प्रतिनिधिसँगै नेपाली जनसम्पर्क समिति तथा भ्रातृ संस्थातर्फका प्रतिनिधिहरूले पहाड हलबाट मतदान गर्ने व्यवस्था मिलाइएको छ।
निर्वाचन समितिले सार्वजनिक गरेको विवरणमा मतदान गर्ने प्रतिनिधिको संख्याबारे फरक-फरक आँकडा उल्लेख भएका छन्। सदस्य सचिव कटुवालले ७ हजार ३ सय १७ प्रतिनिधि रहेको बताएका छन् भने अर्को विवरणमा ७ हजार २५५ प्रतिनिधिले मतदान गर्ने उल्लेख छ। मतदानका लागि अन्तिम मतदाता नामावली रुजु गरिनेछ।
परिचयपत्र जाँचपछि मात्रै मतदान
मतदान प्रक्रियालाई व्यवस्थित र निष्पक्ष बनाउन निर्वाचन समितिले परिचयपत्र तथा मतदाता नामावली अनिवार्य रूपमा रुजु गर्ने व्यवस्था गरेको छ। मतदानस्थलमा प्रवेश गरेका प्रतिनिधिहरूले आफूलाई तोकिएको केन्द्रमा पुगेर आवश्यक प्रमाणीकरण पूरा गरेपछि मात्रै मतपत्र प्राप्त गर्नेछन्।
निर्वाचन आचारसंहिताले निषेध गरेका सामग्री, मोबाइल फोनलगायतका वस्तु मतदानस्थलमा लैजान नपाइने निर्वाचन समितिले जनाएको छ। प्रतिनिधिहरूलाई तोकिएको नियम पालना गर्दै मतदान प्रक्रियामा सहभागी हुन आग्रह गरिएको छ।
मतदानपछि मतगणना, नयाँ नेतृत्वको प्रतीक्षा
कांग्रेसको केन्द्रीय कार्यसमिति निर्वाचनका लागि उम्मेदवारी दर्ता, दाबी–विरोध तथा उम्मेदवारी फिर्ताको प्रक्रिया सम्पन्न भइसकेको छ। निर्वाचन समितिले उम्मेदवारहरूको अन्तिम नामावली सार्वजनिक गरिसकेकाले अब प्रतिनिधिहरूको मतबाट पार्टीको आगामी नेतृत्व चयन हुनेछ।
मतदानबाट सभापति, उपसभापति, महामन्त्री, सहमहामन्त्री र विभिन्न समूहका केन्द्रीय सदस्य निर्वाचित हुनेछन्। मतदान सम्पन्न भएपछि मतपेटिकाको सुरक्षित व्यवस्थापन गरी आवश्यक प्रक्रिया पूरा गरेर मतगणना अघि बढाइने निर्वाचन समितिले जनाएको छ। मतगणना पूरा भएपछि निर्वाचन परिणाम सार्वजनिक गरिनेछ।
१५औँ महाधिवेशनले विधान संशोधनमार्फत कांग्रेसको केन्द्रीय कार्यसमिति २९७ सदस्यीय बनाएको छ। यही संरचनाअनुसार चयन हुने नयाँ नेतृत्वले आगामी कार्यकालमा पार्टीको संगठन सञ्चालन र राजनीतिक गतिविधिको जिम्मेवारी सम्हाल्नेछ।
सभापतिसहित प्रमुख पदमा प्रतिस्पर्धा रहेकाले यसपटकको निर्वाचनलाई कांग्रेसको भावी राजनीतिक दिशा र संगठनात्मक रणनीति निर्धारण गर्ने महत्वपूर्ण अवसरका रूपमा हेरिएको छ। मतदानपछि सार्वजनिक हुने परिणामले पार्टीभित्रको शक्ति सन्तुलन र आगामी कार्यकालको नेतृत्वको स्वरूप स्पष्ट पार्नेछ।
