काठमाडौं । नेपाली कांग्रेसको १५औँ महाधिवेशनमा केन्द्रीय सदस्य पदका लागि आदिवासी जनजाति महिलातर्फ उम्मेदवारी दिनुभएकी माननीय डा. गंगा लक्ष्मी अवालले समावेशी नेतृत्व, सशक्त प्रतिनिधित्व र समुन्नत नेपालको निर्माणलाई आफ्नो प्राथमिकतामा राख्दै मतदातासँग अमूल्य मतसहित विजयी गराउन अपिल गर्नुभएको छ। उहाँले ‘परम्पराको सम्मान, परिवर्तनको संकल्प र समुन्नत नेपालका लागि सवल कांग्रेस’ भन्ने मूल भावनासहित आफ्नो उम्मेदवारी प्रस्तुत गर्नुभएको छ।
डा. अवालले आदिवासी जनजाति समुदायको अधिकार र समावेशी प्रतिनिधित्वलाई अझ सुदृढ बनाउने, महिलाको नेतृत्व विकास, क्षमता अभिवृद्धि तथा निर्णय तहमा अर्थपूर्ण सहभागिता सुनिश्चित गर्ने प्रतिबद्धता व्यक्त गर्नुभएको छ। साथै युवा, महिला तथा नयाँ पुस्तालाई पार्टीभित्र आकर्षित गर्दै उनीहरूका लागि अवसर विस्तार गर्ने र शिक्षा, स्वास्थ्य, सीप विकास तथा रोजगारीका अवसरमा विशेष जोड दिने उहाँको प्राथमिकता रहेको छ।
उहाँले भाषा, संस्कृति, सम्पदा र पहिचानको संरक्षण तथा प्रवर्द्धनका लागि निरन्तर आवाज उठाउने बताउनुभएको छ। समावेशी, सुशासनयुक्त र उत्तरदायी पार्टी निर्माणमा सक्रिय भूमिका निर्वाह गर्ने तथा समुदायबीच एकता, सद्भाव र सामाजिक न्याय स्थापनाका लागि काम गर्ने प्रतिबद्धता पनि उहाँले अघि सार्नुभएको छ।
त्यसैगरी डा. अवालले दिगो विकास, वातावरण संरक्षण तथा जलवायु न्यायका विषयलाई प्राथमिकताका साथ उठाउने बताउनुभएको छ। ग्रामीण तथा पिछडिएका क्षेत्रमा पूर्वाधार विकास, कृषि र स्थानीय अर्थतन्त्रलाई सुदृढ बनाउने तथा विकासका अवसरलाई सबै समुदाय र भूगोलसम्म समान रूपमा पुर्याउन पहल गर्ने उहाँको प्रतिबद्धता छ। कांग्रेसका मूल्य, मान्यता र लोकतान्त्रिक संस्कृतिलाई जनतामाझ अझ मजबुत बनाउँदै पार्टीलाई निर्वाचनमा विजयी बनाउन योगदान गर्ने उहाँले बताउनुभएको छ।
परम्पराको सम्मान गर्दै परिवर्तनलाई आत्मसात् गर्ने र समुन्नत नेपालको यात्रालाई अघि बढाउने लक्ष्यसहित डा. गंगा लक्ष्मी अवालले १५औँ महाधिवेशनमा आदिवासी जनजाति महिलातर्फ केन्द्रीय सदस्य पदमा उम्मेदवारी दिनुभएको हो। उहाँको उम्मेदवारीले कांग्रेसभित्र आदिवासी जनजाति महिला नेतृत्व र समावेशी प्रतिनिधित्वलाई थप बल पुग्ने अपेक्षा गरिएको छ। त्यसैले समावेशी नेतृत्व र सशक्त प्रतिनिधित्वका लागि डा. अवाललाई अमूल्य मतसहित विजयी गराउन अपिल गरिएको हाे।
