काठमाडौँ । नेपाली कांग्रेसका दुई महिला नेतृ डिला संग्रौला र महालक्ष्मी उपाध्याय ‘डिना’ले पार्टीको महामन्त्री पदमा उम्मेदवारी दिने घोषणा गरेका छन्। दुवै नेतृले पार्टीको नेतृत्व संरचनामा महिलाको प्रतिनिधित्व थप सशक्त बनाउन आफूहरू महामन्त्रीको दौडमा अघि बढेको बताएका छन्।
संग्रौलाले आज महाधिवेशनस्थलमा पत्रकार सम्मेलन गर्दै महामन्त्री पदमा आफ्नो उम्मेदवारी घोषणा गरेकी हुन्। उनी कांग्रेसको विशेष महाधिवेशनबाट सहमहामन्त्री पदमा निर्वाचित भएकी थिइन्। पत्रकार सम्मेलनमार्फत उनले पार्टीलाई थप सुदृढ र समावेशी बनाउने लक्ष्यसहित महामन्त्रीमा उम्मेदवारी दिन लागेको बताइन्।
यसैगरी, महालक्ष्मी उपाध्याय ‘डिना’ले पनि महामन्त्री पदमा उम्मेदवारी दिने तयारी अघि बढाएकी छन्। उनी कांग्रेसको १४औँ महाधिवेशनबाट सहमहामन्त्रीमा निर्वाचित भएकी हुन्। डिनाले पार्टीभित्र आफ्नो राजनीतिक अनुभव र जिम्मेवारीलाई थप प्रभावकारी रूपमा अघि बढाउन महामन्त्रीको भूमिकामा जाने तयारी गरेको बताएकी छन्।
कांग्रेसले जारी महाधिवेशनबाट विधान संशोधन गर्दै महामन्त्रीको संख्या तीन पुर्याउने तयारी गरेको छ। प्रस्तावित व्यवस्थाअनुसार तीन महामन्त्रीमध्ये कम्तीमा एक जना महिला हुने व्यवस्था गरिने भएकाले महिला नेतृहरूबीच पनि महामन्त्री पदका लागि प्रतिस्पर्धा बढेको हो।
महामन्त्री पदमा संग्रौला र डिनाको दाबीले कांग्रेसको आगामी नेतृत्वमा महिला सहभागिताको विषयलाई थप चर्चामा ल्याएको छ। विधान संशोधनपछि महामन्त्री पदको संरचना र उम्मेदवारहरूको अन्तिम टुंगो लागेसँगै कांग्रेसभित्र नेतृत्व चयनको प्रतिस्पर्धा थप रोचक बन्ने देखिएको छ।
