भक्तपुर । नेपाली कांग्रेसको १५औँ महाधिवेशनअन्तर्गत भक्तपुर क्षेत्र नं. १ बाट बागमती प्रदेशसभा सदस्य सुरेश श्रेष्ठ केन्द्रीय महाधिवेशन प्रतिनिधिमा निर्वाचित भएका छन्।
कांग्रेसको संगठनमा लामो समयदेखि सक्रिय श्रेष्ठले क्षेत्रीय प्रतिनिधि, एकाइ सभापति तथा पार्टीका नेताहरूबाट प्राप्त विश्वास र समर्थनका आधारमा महाधिवेशन प्रतिनिधिमा निर्वाचित भएको बताएका छन्। निर्वाचित भएपछि उनले सामाजिक सञ्जालमार्फत आफूलाई अत्यधिक मत प्रदान गरी विजयी गराउने सम्पूर्ण क्षेत्रीय प्रतिनिधि, एकाइ सभापति तथा नेताहरूप्रति आभार व्यक्त गरेका छन्।
श्रेष्ठ भक्तपुर कांग्रेसमा युवा पुस्तामाझ परिचित नेता हुन्। उनी बागमती प्रदेश सरकारमा कांग्रेस नेता इन्द्रबहादुर बानियाँ मुख्यमन्त्री हुँदा पर्यटन मन्त्रीका रूपमा समेत जिम्मेवारी सम्हालिसकेका छन्। पर्यटन मन्त्रीका रूपमा प्रदेशको पर्यटन प्रवर्द्धन तथा विकासका विषयमा काम गरेका श्रेष्ठलाई भक्तपुर कांग्रेसभित्र सक्रिय, सरल र इमानदार नेताका रूपमा लिने गरिएको छ।
महाधिवेशन प्रतिनिधिमा निर्वाचित भएपछि श्रेष्ठले आफूलाई प्राप्त विश्वास र मायालाई सधैँ सम्मान गर्दै आगामी दिनमा अझ जिम्मेवार र प्रतिबद्ध भएर पार्टी तथा जनताको सेवामा अघि बढ्ने बताएका छन्।
उनले आफ्नो विजयमा सहयोग गर्ने सबैप्रति हार्दिक धन्यवाद तथा कृतज्ञता व्यक्त गर्दै आगामी दिनमा पनि पार्टी संगठनलाई मजबुत बनाउन आफ्नो भूमिका निरन्तर रहने प्रतिबद्धता जनाएका छन्।
