भक्तपुर । नेपाली कांग्रेसको १५औँ महाधिवेशनअन्तर्गत भक्तपुर निर्वाचन क्षेत्र नं. १ बाट पेशागततर्फ अधिवक्ता किरण न्यौपाने महाधिवेशन प्रतिनिधिमा निर्वाचित हुनुभएको छ। २०४७ सालदेखि नेपाली कांग्रेसको राजनीतिमा निरन्तर सक्रिय रहँदै आउनुभएका न्यौपाने लामो राजनीतिक यात्रापछि पहिलोपटक महाधिवेशन प्रतिनिधिको जिम्मेवारीमा निर्वाचित हुनुभएको हो।
निर्वाचित भएसगै न्याैपानेले पार्टीको तर्फबाट मत दिनुहुने सम्पुर्ण नेता तथा कार्यकर्ताहरुलाई धन्यवाद दिदै भन्नुभएकाे छ ” २०४७ साल देखिको अविचलित राजनैतिक यात्रामा पहिलोपल्ट महाधिवेशन प्रतिनिधिमा उम्मेद्वार भए । सवै को सहयोग ,समन्वय र सुभेच्छाले निर्वाचित पनि भए । यो पद र पदले खोजेको भुमिका निर्भाह गर्ने प्रतिवद्वता प्रकट गर्दछु । सहयोगि,सदृदयी मनमा स प्रेम कृतज्ञता अर्पण गर्दछु ।जयनेपाल ।”
कानुन व्यवसायसँगै कांग्रेसको संगठन निर्माण र राजनीतिक गतिविधिमा सक्रिय रहँदै आउनुभएका न्यौपानेले पार्टीका विभिन्न तह र गतिविधिमा निरन्तर सहभागिता जनाउँदै आउनुभएको थियो। लामो समयदेखि पार्टीमा सक्रिय रहे पनि महाधिवेशन प्रतिनिधिका रूपमा निर्वाचित हुने अवसर भने यसपटक प्राप्त गर्नुभएको हो।
न्यौपाने गत फागुन २१ गते सम्पन्न प्रतिनिधिसभा निर्वाचनमा भक्तपुर निर्वाचन क्षेत्र नं. १ बाट नेपाली कांग्रेसका तर्फबाट प्रत्यक्ष उम्मेदवारसमेत बन्नुभएको थियो। उक्त निर्वाचनमा उहाँले ४ हजार २८२ मत प्राप्त गर्नुभएको थियाे।
महाधिवेशन प्रतिनिधिका रूपमा निर्वाचित भएपछि न्यौपानेले पार्टी संगठनलाई थप सुदृढ, व्यवस्थित र समयानुकूल बनाउन आफ्नो भूमिका केन्द्रित गर्ने बताउनुभएको छ। उहाँले पेशागत क्षेत्रको प्रतिनिधित्वलाई प्रभावकारी बनाउँदै विधिको शासन, लोकतान्त्रिक मूल्य–मान्यता र संगठनात्मक सुधारका विषयलाई प्राथमिकतामा राख्ने धारणा अघि सार्नुभएको छ।
कांग्रेसलाई बलियो र जनमुखी लोकतान्त्रिक संगठनका रूपमा अघि बढाउन अनुभवी नेता–कार्यकर्ता, पेशागत क्षेत्र र नयाँ पुस्ताबीच समन्वय आवश्यक रहेको उहाँको भनाइ छ। पार्टीभित्र विचार, अनुभव र पेशागत दक्षताको सम्मान गर्दै सबै तहका नेता तथा कार्यकर्ताको सहभागिता सुनिश्चित गर्न आफूले भूमिका खेल्ने न्यौपानेले बताउनुभएको छ।
लामो समयदेखि कांग्रेसको राजनीतिमा सक्रिय रहँदै आएका न्यौपानेका लागि महाधिवेशन प्रतिनिधिमा भएको यो निर्वाचित परिणाम पार्टी संगठनभित्रको उनको राजनीतिक यात्राको अर्को महत्वपूर्ण जिम्मेवारीका रूपमा देखिएको छ।
