काठमाडौं । जेनजी आन्दोलनका क्रममा आगजनीबाट क्षतिग्रस्त भएको भाटभटेनी सुपर मार्केटको टंगालस्थित स्टोर आजदेखि पुनः सञ्चालनमा आएको छ। पुनर्निर्माण तथा आवश्यक व्यवस्थापनको काम पूरा गरेपछि टंगाल स्टोर आज बिहान १० बजेदेखि ग्राहकका लागि खुला गरिएको हो। भाटभटेनीका प्रमुख सञ्चालन अधिकृत पानु पौडेलका अनुसार स्टोरको पुनर्निर्माण सम्पन्न गरी नियमित सेवा सुरु गरिएको हो।
जेनजी आन्दोलनका क्रममा देशभर भाटभटेनीका १२ वटा स्टोरमा क्षति पुगेको थियो। तीमध्ये टंगालसहित १० वटा स्टोर पुनः सञ्चालनमा आइसकेका छन्। अब दमक र हेटौंडास्थित स्टोर सञ्चालनमा आउन बाँकी छन्। कम्पनीका अनुसार दुवै स्टोरको पुनर्निर्माण पनि अन्तिम चरणमा पुगेको छ र छिट्टै सञ्चालनमा ल्याउने तयारी भइरहेको छ।
भाटभटेनीका अध्यक्ष तथा प्रबन्ध निर्देशक मीनबहादुर गुरुङले आन्दोलनका क्रममा ठूलो भौतिक क्षति भए पनि कम्पनीले पुनर्निर्माणको कामलाई निरन्तरता दिएको बताएका छन्। उनले कठिन परिस्थितिमा स्टोर पुनर्निर्माणमा सहयोग गर्ने ग्राहक, कर्मचारी तथा शुभेच्छुकप्रति आभार व्यक्त गर्दै भनेका छन्, ‘मनमा पीडा थियो, आँखामा आँसु थियो, आँखै अगाडिका स्टोरमा आगो बलिरहेका थिए। तर पनि हामीले राज्यप्रतिको दायित्व बिर्सिएनौं। हामी एउटा निष्कर्षमा पुग्यौं– खरानीबाट फेरि उठ्नेछौं।’
आन्दोलनबाट ठूलो भौतिक क्षति भए पनि कम्पनीले १० हजारभन्दा बढी कर्मचारीको रोजगारीलाई निरन्तरता दिएको जनाएको छ। कठिन परिस्थितिमा समेत कर्मचारीलाई सेवाबाट अलग नगरिएको र गत वर्षको दसैं बोनससमेत कटौती नगरी रोजगारीलाई निरन्तरता दिइएको गुरुङले बताएका छन्। पुनर्निर्माणका क्रममा चौबीसै घन्टा खटिएका कर्मचारी तथा सहयोगीप्रति पनि कम्पनीले आभार व्यक्त गरेको छ।
टंगाल स्टोर पुनः सञ्चालनमा आएसँगै ग्राहकले नियमित रूपमा आवश्यक वस्तु तथा सेवा प्राप्त गर्न सक्ने कम्पनीले जनाएको छ। साथै, आधुनिक सुविधा, गुणस्तरीय सेवा तथा सहज किनमेलको वातावरण उपलब्ध गराउने प्रतिबद्धता कम्पनीले जनाएको छ। पुनर्निर्माणमा सहयोग गर्ने ग्राहक, सहयोगी संस्था, शुभेच्छुक तथा प्रतिकूल परिस्थितिमा निरन्तर खटिएका कर्मचारीप्रति कम्पनीले धन्यवाद व्यक्त गरेको छ।
