काठमाडौं । राष्ट्रिय स्वतन्त्र पार्टी (रास्वपा) कोसी प्रदेश कमिटीको आयोजनामा संसदीय दलको कार्यालय, सिंहदरबारमा विशेष बैठक सम्पन्न भएको छ। बैठकमा पार्टीको संगठनात्मक अवस्था, समसामयिक विषय तथा आगामी कार्यदिशाका बारेमा छलफल गरिएको थियो।
बैठकमा रास्वपाका केन्द्रीय महामन्त्री विपिन आचार्य, उपमहासचिव निशा डाँगी, कोषाध्यक्ष डा. मनोहर प्रधान, संसदीय दलका उपप्रमुख गणेश पराजुली तथा स्वास्थ्य मन्त्री निशा मेहताको सहभागिता रहेको थियो।
त्यसैगरी संसदीय दलका सचेतक प्रकाशचन्द्र परिवार, केन्द्रीय सदस्यहरू तथा रास्वपाबाट निर्वाचित एवं मनोनीत कोसी प्रदेशका सांसदहरूको पनि बैठकमा सहभागिता रहेको थियो। बैठकमा प्रदेश कमिटीका पदाधिकारी तथा जिल्ला तहका नेताहरूको समेत उपस्थिति रहेको थियो।
बैठकमा रास्वपा कोसी प्रदेश कमिटीका सभापति चन्द्र राईसहित कोसी प्रदेशका १४ वटै जिल्लाका जिल्ला अध्यक्षहरू सहभागी भएका थिए। सहभागीहरूले प्रदेश तथा जिल्ला तहमा पार्टीको संगठन सुदृढीकरण, समन्वय र आगामी गतिविधिका विषयमा धारणा राखेका थिए।
विशेष बैठकले पार्टीको आगामी कार्यदिशालाई थप प्रभावकारी बनाउने उद्देश्यले विभिन्न नीति तथा योजनाहरू तय गरेको जनाइएको छ। बैठकबाट तय गरिएका योजनालाई प्रदेश, जिल्ला तथा स्थानीय तहसम्म प्रभावकारी रूपमा कार्यान्वयन गर्ने विषयमा समेत छलफल भएको बताइएको छ।
