काठमाण्डौ । मुक्तिनाथ म्युचुअल फण्डअन्तर्गत सञ्चालन हुने ‘मुक्तिनाथ म्युचुअल फण्ड २’ को इकाई बिक्री आजदेखि खुला भएको छ। मुक्तिनाथ विकास बैंक कोष प्रवर्द्धक तथा मुक्तिनाथ क्यापिटल योजना व्यवस्थापक रहेको यस योजनाले कुल १० करोड इकाई निष्कासन गर्न लागेको हो।
कुल निष्कासनमध्ये बीज पुँजीबापत २० लाख इकाई योजना व्यवस्थापक मुक्तिनाथ क्यापिटल लिमिटेडका लागि र १ करोड ३० लाख इकाई कोष प्रवर्द्धक मुक्तिनाथ विकास बैंकका लागि सुरक्षित गरिएको छ। बाँकी ८ करोड ५० लाख इकाई भने सर्वसाधारणका लागि निष्कासन गरिएको हो।
इकाई खरिद गर्न इच्छुक लगानीकर्ताले न्यूनतम १०० कित्ता र अधिकतम १ करोड इकाईका लागि आवेदन दिन सक्नेछन्। यस योजनामा लगानी गर्न इच्छुक सर्वसाधारणले नेपाल धितोपत्र बोर्डबाट धितोपत्र दरखास्त संकलनका लागि अनुमति प्राप्त बैंक तथा वित्तीय संस्थाका आस्वा सदस्य रहेका सम्पूर्ण कार्यालयबाट आवेदन दिन सक्नेछन्।
योजनाको इकाई बिक्री छिटोमा असोज ६ गते र ढिलोमा असोज १५ गते बैंकिङ समयपछि बन्द हुनेछ। निर्धारित अवधिभित्र मागअनुसार आवेदन नपरेमा बिक्री अवधि असोज १५ गतेसम्म कायम रहनेछ।
‘मुक्तिनाथ म्युचुअल फण्ड २’ को धितोपत्र निष्कासन तथा बिक्री प्रबन्धकको जिम्मेवारी मुक्तिनाथ क्यापिटल लिमिटेडले सम्हालेको छ। योजनामार्फत सर्वसाधारण लगानीकर्तालाई सामूहिक लगानी कोषमा सहभागी हुने अवसर प्रदान गरिएको छ।
