सुनसरी । ‘मस्जिदबाट राहत सहयोग अभियान’ अन्तर्गत सुनसरी मुस्लिम समाजले बाढी–पहिरो प्रभावितका लागि प्रधानमन्त्री उद्धार कोषमा ६२ लाख ४५ हजार ४९ रुपैयाँ सहयोग गरेको छ। समाजले आज उक्त रकम प्रधानमन्त्री उद्धार कोषमा जम्मा गरेको हो।
त्यस्तै, कतारमा कार्यरत सुनसरी मुस्लिम समाज कतारले पनि बाढी–पहिरो पीडितको सहयोगार्थ प्रधानमन्त्री उद्धार कोषमा ४ लाख रुपैयाँ सहयोग गरेको छ। विपत्तिको समयमा स्वदेश तथा विदेशमा रहेका नेपाली मुस्लिम समुदायबाट सहयोग जुट्दै आएको समाजले जनाएको छ।
भूकम्प, कोरोना महामारी, चिसो, बाढी–पहिरोलगायत विभिन्न प्राकृतिक तथा मानवीय विपत्तिका बेला मुस्लिम समुदायले सामुदायिक एक्यबद्धता जनाउँदै सहयोग र हातेमालो गर्दै आएको छ। पछिल्लो राहत अभियानले पनि विपत्तिमा पीडित नागरिकको साथमा उभिने सामाजिक उत्तरदायित्वलाई थप बलियो बनाएको छ।
देशभरका मस्जिदहरूमा बाढी–पहिरो प्रभावितका लागि ‘मस्जिदबाट राहत सहायता अभियान’ सञ्चालन भइरहेको छ। विपत्तिबाट प्रभावित परिवारलाई राहत तथा सहयोग उपलब्ध गराउने उद्देश्यले सञ्चालन गरिएको अभियानमा विभिन्न मस्जिद, मुस्लिम समुदाय तथा शुभेच्छुकहरू सहभागी भइरहेका छन्।
अभियानलाई व्यवस्थित रूपमा सञ्चालन तथा सहजीकरण गर्न मुस्लिम आयोगले हेल्प डेस्क समितिसमेत गठन गरेको छ। विपत्तिको यस कठिन घडीमा समुदाय, धार्मिक संस्था र नागरिक तहबाट भइरहेको सहयोगले राष्ट्रिय एकता र सामाजिक सद्भावलाई थप मजबुत बनाउने विश्वास गरिएको छ।
