मकवानपुर । भोटेकोसी बाढीबाट प्रभावित परिवारको राहत तथा सहयोगका लागि राष्ट्रिय ख्रीष्टियन महासंघ नेपाल, मकवानपुरले ४ लाख रुपैयाँ सहयोग गरेको छ। बाढीबाट प्रभावित तथा विपद्मा परेका परिवारलाई राहत उपलब्ध गराउने उद्देश्यले महासंघले उक्त रकम सहयोग गरेको हो।
राष्ट्रिय ख्रीष्टियन महासंघ नेपालको केन्द्रीय कार्यालयको निर्देशनअनुसार मकवानपुर शाखाले राहत सहयोग अघि बढाएको जनाएको छ। महासंघले विपद्का बेला पीडितको आवश्यकता पहिचान गरी प्रभावकारी रूपमा सहयोग पुर्याउन शाखा तथा स्थानीय तहसँग समन्वय गर्ने नीति लिएको जनाएको छ।
सरकारले विपद्पछिको राहत वितरणमा लागू गरेको एकद्वार प्रणालीलाई मध्यनजर गर्दै महासंघले सहयोग रकम सम्बन्धित जिल्ला प्रशासन कार्यालयमार्फत उपलब्ध गराएको हो। सोहीअनुसार प्रमुख जिल्ला अधिकारी (सीडीओ) मार्फत चेक हस्तान्तरण गरी सरकारी संयन्त्रसँगको समन्वयमा राहत कार्यमा सहयोग पुर्याइएको महासंघले जनाएको छ।
महासंघ मकवानपुरका अध्यक्ष नवराज घलानले भोटेकोसी बाढीबाट मकवानपुरमा प्रभावित भएका परिवारहरूको पहिचान गरी उनीहरूलाई समेत आवश्यकताअनुसार राहत हस्तान्तरण गर्ने प्रतिबद्धता जनाएका छन्। उनले वास्तविक पीडितसम्म राहत पुग्ने गरी स्थानीय प्रशासन तथा सम्बन्धित निकायसँग समन्वय गरिने बताए।
अध्यक्ष घलानले बाढीका कारण प्रभावित परिवारको अवस्था र आवश्यकताको पहिचान गरी त्यसैअनुसार थप सहयोग गरिने बताए। विपद्को समयमा पीडितको साथमा उभिनु मानवीय दायित्व भएको उल्लेख गर्दै उनले महासंघले आगामी दिनमा पनि राहत, पुनःस्थापना तथा सामाजिक सहयोगका क्षेत्रमा आवश्यक सहकार्यलाई निरन्तरता दिने बताए।
राष्ट्रिय ख्रीष्टियन महासंघ नेपाल, मकवानपुरले बाढी तथा अन्य विपद्बाट प्रभावित परिवारलाई राहत तथा पुनःस्थापनाका लागि आवश्यक सहयोग जुटाउन आफूहरू निरन्तर सक्रिय रहने जनाएको छ। सरकारी एकद्वार प्रणाली र सम्बन्धित प्रशासनिक निकायसँगको समन्वयमा राहत कार्यलाई व्यवस्थित र प्रभावकारी बनाउँदै वास्तविक पीडितसम्म सहयोग पुर्याउने महासंघको भनाइ छ।
