काठमाडौं । प्रभु महालक्ष्मी लाइफ इन्स्योरेन्स लिमिटेडले प्रधानमन्त्री दैवी प्रकोप उद्धार कोषमा ५१ लाख रुपैयाँ सहयोग गरेको छ। भदौ १० गते रसुवाको भोटेकोशी नदीमा आएको विनाशकारी बाढीबाट प्रभावित नागरिकको उद्धार तथा राहतका लागि कम्पनीले उक्त रकम सहयोग गरेको हो।
२०८३ साल भदौ १६ गते अर्थ मन्त्रालयमा आयोजित कार्यक्रममा कम्पनीका सञ्चालक समिति अध्यक्ष संझना अर्याल, सञ्चालक समिति सदस्यहरू वीरेन्द्र जंग पाण्डे र शम्सेर पराजुली तथा प्रमुख कार्यकारी अधिकृत सन्तोष प्रसाईले ५१ लाख रुपैयाँको चेक अर्थमन्त्री स्वर्णिम वाग्लेलाई हस्तान्तरण गर्नुभएको हो।
भोटेकोशी नदीमा आएको बाढीका कारण रसुवासहित नुवाकोट, धादिङ, गोरखा तथा चितवन लगायतका नदी तटीय क्षेत्रमा ठूलो मानवीय तथा भौतिक क्षति भएको छ। बाढीका कारण धेरै परिवार प्रभावित हुनुका साथै घर, सडक, पुल तथा अन्य भौतिक संरचनामा समेत क्षति पुगेको छ।
प्रभु महालक्ष्मी लाइफ इन्स्योरेन्सले विपद्को यस कठिन घडीमा प्रभावित नागरिकको राहत तथा उद्धारमा सहयोग पुर्याउने उद्देश्यले कोषमा रकम प्रदान गरेको जनाएको छ। कम्पनीले बाढी तथा विपद्बाट भएको जनधनको क्षतिप्रति गहिरो दुःख व्यक्त गर्दै प्रभावित परिवारप्रति सहानुभूति समेत प्रकट गरेको छ।
कम्पनीले सामाजिक उत्तरदायित्वअन्तर्गत संकटको समयमा राज्य तथा नागरिकसँग सहकार्य गर्दै जाने प्रतिबद्धता व्यक्त गरेको छ। बाढी प्रभावितको उद्धार, राहत तथा पुनःस्थापनाका लागि आवश्यक सहयोगमा सधैँ साथ रहने वाचा गर्दै कम्पनीले विपद्को समयमा सबै पक्षलाई मानवीय सहयोगका लागि अघि बढ्न आग्रह गरेको छ।
