सर्लाही । देशका विभिन्न क्षेत्रमा आएको भीषण बाढीबाट ठूलो जनधनको क्षति भएपछि पीडितको राहत तथा उद्धारका लागि देशभर सहयोग अभियान तीव्र बनेको छ। यसैक्रममा मुस्लिम शान्ति समाज, सर्लाहीको पहलमा मलंगवा लगायतका स्थानबाट संकलित राहत सामग्री रसुवाका बाढीपीडितका लागि पठाइएको छ।
राहत सामग्री बोकेको गाडी रसुवातर्फ पठाउने क्रममा आयोजित बिदाइ कार्यक्रममा नेपाल संघीय समाजवादी पार्टीका अध्यक्ष तथा पूर्व राज्यमन्त्री रिजवान अन्सारी, मधेश प्रदेशकी पूर्व गृहमन्त्री, कानून तथा सञ्चारमन्त्री बिमला अन्सारी, समाजसेवी डा. अब्दुर रहिम मिक्रानी, युवा नेता समीर मिक्रानी, मैनुद्दिन अन्सारी लगायतको उपस्थिति थियो।
कार्यक्रममा अध्यक्ष रिजवान अन्सारीले बाढीमा ज्यान गुमाएका नागरिकप्रति श्रद्धाञ्जली तथा शोकसन्तप्त परिवारप्रति समवेदना व्यक्त गर्दै विपत्तिलाई कुनै जात, धर्म, क्षेत्र वा समुदायको मात्र समस्या नठान्न आग्रह गरे। उनले बाढीबाट प्रभावित नागरिकको पीडा सिंगो राष्ट्रको साझा पीडा भएकाले सबै नेपाली एकजुट हुनुपर्ने बताए।
अन्सारीले राजनीतिक आस्था, धार्मिक तथा जातीय पहिचान र क्षेत्रीय विभाजनभन्दा माथि उठेर मानवता र राष्ट्रिय एकतालाई प्राथमिकता दिन राजनीतिक दल, नागरिक समाज, सामाजिक संघसंस्था, धार्मिक समुदाय तथा आम नागरिकलाई आह्वान गरे। संकटको समयमा हाम्रो साझा परिचय ‘नेपाली’ भएको भन्दै उनले सक्ने सबैलाई राहत अभियानमा योगदान गर्न आग्रह गरे।
राहत संकलन तथा व्यवस्थापनमा सक्रिय मुस्लिम शान्ति समाज, सर्लाहीका जिल्ला अध्यक्ष अब्दुल अजीज छोटेसहित मैनुद्दिन अन्सारी, सलमान मिक्रानी लगायत सहयोगीहरूलाई अन्सारीले धन्यवाद व्यक्त गरे। उनले राहत तथा पुनर्स्थापनाको आवश्यकता रहुन्जेल अभियानलाई निरन्तरता दिनुपर्ने र सबै राजनीतिक दलका नेता–कार्यकर्तालाई प्रभावित क्षेत्रमा सक्रिय हुन आग्रह गरे।
मलंगवाबाट रसुवातर्फ पठाइएको राहत सामग्री चार सदस्यीय टोलीले लिएर गएको जनाइएको छ। अध्यक्ष अन्सारीले पठाइएको राहत सामग्री खाद्यान्न तथा आवश्यक वस्तु मात्र नभई मलंगवादेखि रसुवासम्म पुगेको नेपाली एकता, सद्भाव र मानवताको सन्देश भएको बताए। मुस्लिम शान्ति समाजले आगामी दिनमा पनि विपद् प्रभावित नागरिकका लागि राहत तथा सहयोग अभियानलाई निरन्तरता दिने जनाएको छ।
