काठमाडौँ । धादिङमा नदीले बगाएर ल्याएको सेफ (तिजोरी) फोडेर रकम निकाल्ने २९ जनालाई सशस्त्र प्रहरी बल र नेपाल प्रहरीको संयुक्त टोलीले नियन्त्रणमा लिएको छ। बाढी तथा विपद्को मौका छोपेर सेफ फुटाई नगद रकम निकालिरहेको अवस्थामा उनीहरूलाई नियन्त्रणमा लिइएको प्रहरीले जनाएको छ।
प्रहरीका अनुसार नियन्त्रणमा परेकाहरूबाट ९२ लाख ६८ हजार ५०५ रुपैयाँ नगद बरामद भएको छ। बाढीका कारण नदीले बगाएर ल्याएको सेफमा रहेको रकम उनीहरूले गैरकानुनी रूपमा निकालेर लैजान खोजेको प्रारम्भिक अनुसन्धानबाट खुलेको प्रहरीले जनाएको छ।
पक्राउ परेका सबैलाई आवश्यक अनुसन्धान तथा कानुनी कारबाहीका लागि जिल्ला प्रहरी कार्यालय धादिङको हिरासतमा राखिएको छ। घटनाबारे थप अनुसन्धान भइरहेको र बरामद रकम तथा सेफको वास्तविक स्रोतका विषयमा समेत प्रहरीले अनुसन्धान अघि बढाएको जनाएको छ।
केन्द्रीय प्रहरी प्रवक्ता डीआईजी अबिनारायण काफ्लेका अनुसार विपद्को अवस्थामा भेटिएको धनमाल आफैंले कब्जा गर्ने वा नष्ट गर्ने कार्य कानुनविपरीत भएकाले घटनामा संलग्नमाथि प्रचलित कानुनअनुसार कारबाही प्रक्रिया अघि बढाइनेछ। प्रहरीले विपद्का बेला भेटिएका नगद तथा अन्य सम्पत्ति सम्बन्धित निकायलाई बुझाउन सर्वसाधारणलाई आग्रह गरेको छ।
