काठमाडौं । जिल्ला अदालत काठमाडौंले सहकारी ठगीको आरोपमा मुद्दा खेपिरहेका एमालेका पूर्वसांसद इच्छाराज तामाङसहित १७ जनालाई ठगी कसुरमा दोषी ठहर गरेको छ।
न्यायाधीश कृतबहादुर बोहराको इजलासले तामाङसहित दुर्गाप्रसाद संग्रौला, जयन्द्रलाल श्रेष्ठ, खेमनाथ डल्लाकोटी, प्रविणप्रसाद प्रधान, केशवलाल श्रेष्ठ, रामकृष्ण पौडेल, सुमन नन्दन, हरिहरप्रसाद लामिछाने, मुकुन्दप्रसाद नेउपाने, दानहिरा तुलाधर (कंसाकार), नगेन्द्र विमली, रामराज मास्के, हरिप्रसाद रिसाल, सिर्जना शाक्य (तामाङ), लालकाजी गुरुङ र मिना गुरुङलाई दोषी ठहर गरिएको हो।
अदालतले प्रतिवादीहरूलाई उनीहरूले गरेको कसुरअनुसार हुने सजाय भने तत्काल निर्धारण गरेको छैन। आदेशअनुसार सजाय निर्धारणका लागि भदौ २५ गते छुट्टै सुनुवाइ हुने भएको छ।
कानुनी व्यवस्थाअनुसार तीन वर्षभन्दा बढी कैद हुन सक्ने मुद्दामा दोषी ठहर भएपछि सजाय निर्धारणका लागि छुट्टै सुनुवाइ गर्नुपर्ने भएकाले अदालतले भदौ २५ गतेका लागि पेसी तोकेको हो।
सहकारी ठगी प्रकरणमा लामो समयदेखि कानुनी प्रक्रियामा रहेका तामाङसहितका प्रतिवादी दोषी ठहर भएसँगै अब उनीहरूमाथि हुने सजायबारे भदौ २५ गतेको सुनुवाइबाट टुंगो लाग्नेछ।
