भक्तपुर । रसुवामा आएको विनाशकारी बाढीबाट प्रभावित नागरिकको उद्धार तथा राहतका लागि चाँगुनारायण नगरपालिकाले प्रधानमन्त्री दैवी प्रकोप उद्धार कोषमा ५० लाख ३५ हजार रुपैयाँ सहयोग गर्ने निर्णय गरेको छ। नगरपालिकाले विपद्को यस कठिन घडीमा मानवीय संवेदना र सामाजिक उत्तरदायित्वलाई प्राथमिकतामा राख्दै उक्त सहयोग रकम प्रदान गर्ने निर्णय गरेको हो।
नगरपालिकाका अनुसार विपद् व्यवस्थापन कोषबाट १० लाख रुपैयाँ सहयोग गरिनेछ। त्यस्तै, नगरपालिकाका जनप्रतिनिधिहरूले एक महिनामा पाउने सेवा–सुविधाबाट ७ लाख रुपैयाँ योगदान गर्ने निर्णय गरेका छन्। राष्ट्रसेवक कर्मचारीहरूको तलबबाट २० लाख ३५ हजार रुपैयाँ तथा नगरपालिकाअन्तर्गतका शिक्षकहरूको योगदानबाट १३ लाख रुपैयाँ जम्मा गरिने भएको छ।
यसरी विभिन्न स्रोतबाट संकलित कुल ५० लाख ३५ हजार रुपैयाँ प्रधानमन्त्री दैवी प्रकोप उद्धार कोषमा जम्मा गरिने नगरपालिकाले जनाएको छ। विपद्का बेला राज्यको राहत तथा उद्धार अभियानमा स्थानीय तहको समेत प्रभावकारी भूमिका हुनुपर्ने भन्दै नगरपालिकाले आफ्नो तर्फबाट सक्दो सहयोग गर्ने प्रतिबद्धता जनाएको हो।
नगरपालिकाले रसुवालगायत बाढी प्रभावित क्षेत्रमा ठूलो जनधनको क्षति भएको अवस्थामा पीडितको उद्धार, राहत र पुनःस्थापनाका लागि सबै पक्ष एकजुट हुनुपर्नेमा जोड दिएको छ। नगरपालिकाले विपद्को पीडामा रहेका नागरिकप्रति ऐक्यबद्धता जनाउँदै आफ्नो क्षमताअनुसार सहयोग गर्न सम्पूर्ण नगरवासीलाई समेत अपिल गरेको छ।
चाँगुनारायण नगरपालिकाले विपद्को समयमा आर्थिक सहयोगसँगै मानवीय सहयोग र सामाजिक जिम्मेवारी निर्वाह गर्नुपर्ने बताएको छ। नगरपालिकाले आफ्नो निर्णयलाई केवल आर्थिक सहयोगमा सीमित नराखी विपद्मा परेका नागरिकको जीवनरक्षा र राहत कार्यमा सबैलाई हातेमालो गर्न आह्वान गरेको छ।
