काठमाडौं । रसुवाको भोटेकोशी तथा त्रिशूली नदीमा आएको विनाशकारी बाढीबाट प्रभावित नागरिकको उद्धार तथा राहतका लागि नेपाल बैंक लिमिटेडले प्रधानमन्त्री दैवी प्रकोप उद्धार कोषमा ३ करोड १ लाख रुपैयाँ आर्थिक सहयोग गरेको छ।
नेपाल बैंकले संस्थागत सामाजिक उत्तरदायित्वअन्तर्गत उक्त रकम कोषमा जम्मा गरेको जनाएको छ। बाढीका कारण रसुवा र नुवाकोट जिल्लाका विभिन्न स्थानमा ठूलो धनजनको क्षति भएपछि प्रभावित नागरिकलाई राहत तथा सहयोग उपलब्ध गराउने उद्देश्यले बैंकले आर्थिक सहयोग गरेको हो।
बैंकका सञ्चालक समिति सदस्य अमृत लम्सालले अर्थ मन्त्रालयमा आयोजित कार्यक्रममा ३ करोड १ लाख रुपैयाँको चेक अर्थमन्त्री डा. स्वर्णिम वाग्लेलाई हस्तान्तरण गर्नुभएको थियो। सो अवसरमा अर्थमन्त्री वाग्लेले विपद्को समयमा सहयोग गरेकोमा नेपाल बैंक परिवारप्रति धन्यवाद व्यक्त गर्नुभएको थियो।
नेपाल बैंकका सञ्चालक समिति सदस्य लम्सालले बाढी, पहिरो, भूकम्प तथा महामारीलगायत राष्ट्रिय विपद्का समयमा बैंकले आर्थिक सहयोग गर्दै आएको बताउँदै यसपटक पनि सोही निरन्तरता स्वरूप रसुवाको भोटेकोशी तथा त्रिशूली नदीमा आएको बाढीबाट पीडित नागरिकलाई सहयोग गरिएको जानकारी दिनुभयो।
कार्यक्रममा बैंकका सञ्चालक समिति सदस्य वद्री खनाल, प्रमुख कार्यकारी अधिकृत तिलकराज पाण्डेय, नायब प्रमुख कार्यकारी अधिकृत हेमबहादुर खड्का तथा सुशासन डिभिजन प्रमुख होमनाथ दाहालको उपस्थिति रहेको थियो। बैंकले आगामी दिनमा पनि विपद् प्रभावित नागरिकको सहयोगका लागि आवश्यक सहकार्य र सहयोग जारी राख्ने प्रतिबद्धता जनाएको छ।
