काठमाडौं । प्रधानमन्त्री बालेन शाहले आज दिउँसो १ बजे बस्ने प्रतिनिधिसभाको बैठकमा सांसदहरूले उठाएका प्रश्नको जवाफ दिने भएका छन्। यसअघि हिजो बस्ने तय भएको बैठक सभामुख डिपी अर्यालकी सासुआमाको निधन भएपछि आजका लागि सारिएको थियो।
झण्डै चार महिनापछि प्रधानमन्त्री शाह प्रतिनिधिसभाको बैठकमा उपस्थित भएर सांसदसँग प्रत्यक्ष संवाद गर्न लागेका हुन्। बैठकमा प्रधानमन्त्रीसँग सांसदहरूले विभिन्न समसामयिक तथा सरकारका कामकारबाहीसँग सम्बन्धित विषयमा प्रश्न गर्ने तयारी गरेका छन्।
प्राप्त जानकारीअनुसार प्रधानमन्त्रीलाई प्रतिपक्षी दलका ११ जना सांसदले प्रश्न गर्ने भएका छन्। उनीहरूले सरकारको कार्यसम्पादन, समसामयिक राजनीतिक विषय तथा जनसरोकारका विषयमा प्रश्न उठाउने बुझिएको छ।
यस्तै, सरकार पक्षका तीन जना सांसदले पनि प्रधानमन्त्री शाहसँग प्रश्न गर्ने तयारी गरेका छन्। प्रतिपक्ष र सत्तापक्ष दुवै तर्फका सांसदका प्रश्नको प्रधानमन्त्रीले बैठकमै जवाफ दिने कार्यक्रम रहेको छ।
आजको बैठकलाई प्रधानमन्त्री शाहको संसदमा लामो समयपछि हुने उपस्थितिका कारण विशेष चासोका साथ हेरिएको छ। प्रधानमन्त्रीले सांसदका प्रश्नमा के जवाफ दिन्छन् भन्ने विषयमा पनि राजनीतिक वृत्तमा चासो बढेको छ।
