हेटौँडा । बागमती प्रदेशसभाको इतिहासमा पहिलोपटक प्रतिपक्षी दलका सांसदहरूको अनुपस्थितिमै प्रदेशसभा बैठक सञ्चालन भएको छ। नवनियुक्त मुख्यमन्त्री किरण थापामगरले विश्वासको मत लिने प्रयोजनका लागि मंगलबार बोलाइएको बैठकमा प्रतिपक्षी दल नेपाली कांग्रेस, हाम्रो नेपाली पार्टी (हानेपा) र नेपाल मजदुर किसान पार्टी (नेमकिपा)का कुनै पनि सांसद उपस्थित भएनन्।
सत्तापक्षमा रहेका नेकपा (एमाले), नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा)का सांसदहरूको उपस्थितिमा बैठक सञ्चालन गरिएको हो। प्रतिपक्षी दलहरूले मुख्यमन्त्री नियुक्ति तथा सरकार गठनको प्रक्रियाप्रति असहमति जनाउँदै बैठक बहिष्कार गर्ने निर्णय गरेपछि प्रदेशसभा प्रतिपक्षी सांसदविहीन बनेको हो।
संविधानको व्यवस्थाअनुसार मुख्यमन्त्री थापामगरले प्रदेशसभाबाट विश्वासको मत लिनुपर्ने भएपछि प्रदेशसभा सचिवालयले मंगलबारका लागि बैठक आह्वान गरेको थियो। तर, बैठक सुरु हुनुअघि नै प्रतिपक्षी दलहरूले सदनमा सहभागी नहुने निर्णय गरेका थिए।
प्रतिपक्षी दलहरूले मुख्यमन्त्री नियुक्तिको प्रक्रिया विवादित रहेको दाबी गर्दै त्यसको न्यायिक निरूपण नभएसम्म प्रदेशसभाको प्रक्रियामा सहभागी नहुने अडान राखेका छन्। विशेषगरी राप्रपाभित्रको विवाद अदालतसम्म पुगेकाले त्यसको टुङ्गो नलागेसम्म सरकारका कामकारबाहीमा सहभागी नहुने र प्रदेशसभा बैठकसमेत बहिष्कार गर्ने विपक्षी दलहरूको भनाइ छ।
