काठमाडौं । सञ्चालनमा रहेका अधिकांश वाणिज्य बैंकले चालु आर्थिक वर्ष २०८२/८३ को नाफाबाट दसैँअघि नै लाभांश वितरण गर्नेगरी तयारी थालेका छन् । बैंकहरूले वार्षिक लेखापरीक्षण प्रतिवेदन तयार गरी असोजको पहिलो सातासम्म साधारणसभा सम्पन्न गर्ने तयारी अघि बढाएका हुन् । हाल आधा दर्जन बैंकको लेखापरीक्षणसहितको वित्तीय विवरण स्वीकृतिका लागि नेपाल राष्ट्र बैंकमा पुगेको छ ।
कानुनी व्यवस्थाअनुसार कुनै पनि संगठित व्यावसायिक संस्थाले आर्थिक वर्ष समाप्त भएको छ महिनाभित्र वार्षिक साधारणसभा सम्पन्न गरिसक्नुपर्छ । साधारणसभा गर्नुअघि वार्षिक लेखापरीक्षण गराउनुपर्ने व्यवस्था छ । बैंक तथा वित्तीय संस्थाको हकमा भने लेखापरीक्षणसहितको वित्तीय विवरण नेपाल राष्ट्र बैंकबाट स्वीकृत गराउनुपर्ने भएकाले लाभांश घोषणा र वितरणको प्रक्रिया केही नियामकीय चरण पूरा गरेपछि मात्रै अघि बढ्छ ।
नेपाल राष्ट्र बैंकका अनुसार नबिल बैंक, एभरेष्ट बैंक, माछापुच्छ्रे बैंक, कुमारी बैंक र सानिमा बैंकले वित्तीय विवरण स्वीकृतिका लागि राष्ट्र बैंकको सुपरिवेक्षण विभागमा पठाएका छन् । पूर्वाधार विकास बैंकका रूपमा रहेको नेपाल इन्फ्रास्ट्रक्चर बैंक (निफ्रा) ले समेत वित्तीय विवरण स्वीकृतिका लागि पठाएको राष्ट्र बैंकले जनाएको छ । यस वर्ष दसैँ असोजको अन्तिमतिर सुरु हुने भएकाले बैंकहरूले असोजको पहिलो सातासम्म साधारणसभा बोलाएर दसैँअघि नै लाभांश वितरण गर्ने लक्ष्य राखेका छन् ।
यसपटक बैंक तथा वित्तीय संस्थाहरूको ध्यान बोनस सेयरभन्दा नगद लाभांशतर्फ बढी देखिएको छ । नेपाल राष्ट्र बैंकले पुँजीकोष अनुपात कायम गर्न अभिमोच्य अग्राधिकार सेयरको व्यवस्था तथा आवश्यकता अनुसार हकप्रद सेयर निष्कासनको बाटो खुला गरेकाले बैंकहरूले बोनस सेयरभन्दा नगद लाभांशलाई प्राथमिकता दिन खोजेका हुन् । बैंकर्सहरूका अनुसार पुँजी संरचना व्यवस्थापनमा सहज हुने भएकाले पनि नगद लाभांशतर्फ आकर्षण बढेको हो ।
हालसम्म दुई विकास बैंकले आर्थिक वर्ष २०८२/८३ को नाफाबाट लाभांश घोषणा गरिसकेका छन् । कामना सेवा विकास बैंकले १५ प्रतिशत नगद लाभांश घोषणा गरेको छ भने सांग्रिला डेभलपमेन्ट बैंकले ४ प्रतिशत बोनस सेयर र ६.५२६३ प्रतिशत नगद लाभांश प्रस्ताव गरेको छ । वाणिज्य बैंकतर्फ भने एभरेष्ट बैंकले ३८.३२ प्रतिशत, सिद्धार्थ बैंकले २६.१५ प्रतिशत, सानिमा बैंकले २०.८५ प्रतिशत, नबिल बैंकले १९.१० प्रतिशत र स्ट्यान्डर्ड चार्टर्ड बैंकले १९.०९ प्रतिशतसम्म लाभांश वितरण गर्न सक्ने क्षमता प्रस्तुत गरेका छन् ।
त्यस्तै, नेपाल बैंकले १५.८४ प्रतिशत, ग्लोबल आइएमई बैंकले १२.०२ प्रतिशत र नेपाल एसबिआई बैंकले ११.०४ प्रतिशतसम्म लाभांश वितरण गर्न सक्ने क्षमता देखाएका छन् । प्राइम कमर्सियल बैंक, एनएमबि बैंक, माछापुच्छ्रे बैंक, लक्ष्मी सनराइज बैंक, कृषि विकास बैंक, सिटिजन्स बैंक इन्टरनेसनल र कुमारी बैंकको लाभांश क्षमता भने एकल अंकमा सीमित रहेको छ । प्रभु बैंक, हिमालयन बैंक, एनआईसी एशिया बैंक र नेपाल इन्भेष्टमेन्ट मेगा बैंकले भने यस वर्ष लाभांश वितरण गर्न सक्ने अवस्था नदेखिएको वित्तीय विवरणले देखाएको छ ।
