काठमाडौँ । नेकपा (एमाले) बागमती प्रदेश संसदीय दलले प्रदेशका मुख्यमन्त्री किरण थापा मगरले आज प्रदेशसभामा पेस गर्ने विश्वासको मतसम्बन्धी प्रस्तावको पक्षमा मतदान गर्न आफ्ना सांसदहरूलाई निर्देशन दिएको छ।
एमाले बागमती प्रदेश संसदीय दलका मुख्य सचेतक एकालाल श्रेष्ठले सोमबार जारी गरेको निर्देशनमा मुख्यमन्त्री थापा मगरले नेपालको संविधानको धारा १८८ को उपधारा (४) बमोजिम प्रदेशसभाबाट विश्वासको मत लिन प्रस्ताव पेस गर्न लागेको उल्लेख छ।
निर्देशनमार्फत एमालेका सम्पूर्ण प्रदेशसभा सदस्यलाई प्रदेशसभा बैठकमा अनिवार्य रूपमा उपस्थित हुन भनिएको छ। बैठकमा अनुपस्थित नहुन र विश्वासको मतसम्बन्धी प्रस्तावमाथिको मतदानमा सहभागी हुन संसदीय दलले सांसदहरूलाई आग्रह गरेको हो।
त्यस्तै, मुख्यमन्त्री थापा मगरले प्रस्तुत गर्ने विश्वासको मतसम्बन्धी प्रस्तावको पक्षमा एकजुट भएर मतदान गर्न एमाले सांसदहरूलाई निर्देशन दिइएको छ। संसदीय दलले पार्टीका सबै प्रदेशसभा सदस्यलाई उक्त निर्देशन पालना गर्न आग्रह गरेको हो।
मुख्यमन्त्री थापा मगरले आज प्रदेशसभामा विश्वासको मत लिन लागेका बेला एमाले संसदीय दलले सांसदहरूलाई यस्तो निर्देशन दिएको हो। विश्वासको मतका लागि आवश्यक समर्थन जुटाउने तयारी भइरहेका बेला एमालेले आफ्ना सांसदलाई अनिवार्य उपस्थित भई प्रस्तावको पक्षमा मतदान गर्न स्पष्ट निर्देशन दिएको हो।
