विराटनगर । कोशी प्रदेशका मुख्यमन्त्री हिक्मतकुमार कार्कीले आज तेस्रो पटक प्रदेशसभाबाट विश्वासको मत लिँदैछन् । मुख्यमन्त्री कार्कीले दिउँसो २ बजे बस्ने प्रदेशसभा बैठकमा विश्वासको मत लिन लागेका हुन् । त्यसका लागि आवश्यक सम्पूर्ण तयारी पूरा भएको प्रदेशसभाका सचिव सुदर्शन खड्काले जानकारी दिए ।
एमाले र नेपाली कम्युनिस्ट पार्टी (नेकपा) बीच भएको तीनबुँदे सहमतिअनुसार गत सोमबार प्रदेश सरकारमा नयाँ मन्त्रीहरूले शपथ लिएका थिए । त्यसअघि नेपाली कांग्रेसले मुख्यमन्त्री कार्कीलाई दिएको समर्थन फिर्ता लिएको थियो । कांग्रेसले भदौ ३ गते नै समर्थन फिर्ता लिएको पत्र प्रदेशसभा सचिवालयमा दर्ता गराएको थियो । एमाले र नेकपाबीच गत साउन ९ गते प्रदेश सरकारमा गठबन्धन गर्ने सहमति भएको थियो ।
संविधानको धारा १६८ को उपधारा (५) बमोजिम २०८१ वैशाख २७ गते मुख्यमन्त्री नियुक्त भएका कार्कीले पहिलोपटक वैशाख ३१ गते विश्वासको मत लिएका थिए । त्यसबेला प्रदेशसभामा उपस्थित ६२ सदस्यमध्ये ५७ जनाले उनको पक्षमा मतदान गरेका थिए भने पाँच जना तटस्थ बसेका थिए । उनलाई एमालेका उपसभामुखसहित ४०, तत्कालीन माओवादी केन्द्रका १३, नेकपा (एकीकृत समाजवादी)का तीन र जनता समाजवादी पार्टी नेपालका एक प्रदेशसभा सदस्यले समर्थन गरेका थिए ।
एमाले र तत्कालीन माओवादी केन्द्रबीचको गठबन्धन टुटेर कांग्रेससँग गठबन्धन बनेपछि मुख्यमन्त्री कार्कीले दोस्रोपटक २०८१ असोज २ गते विश्वासको मत लिएका थिए । त्यसबेला उनको पक्षमा ६६ र विपक्षमा १५ मत परेको थियो भने मतदानमा ८३ सांसद सहभागी भएका थिए । ९२ सदस्यीय कोशी प्रदेशसभामा हाल एमालेका ४०, कांग्रेसका २९, नेपाली कम्युनिस्ट पार्टीका १७, राष्ट्रिय प्रजातन्त्र पार्टीका सभामुखसहित पाँच र जनता समाजवादी पार्टीका एक सांसद छन् । आजको विश्वासको मतसँगै मुख्यमन्त्री कार्की नेतृत्वको सरकारको आगामी राजनीतिक समीकरणसमेत स्पष्ट हुने अपेक्षा गरिएको छ ।
