काठमाडौं। अग्रगामी मोर्चामा आबद्ध राजनीतिक दलका बुद्धिजीवीहरूको महत्वपूर्ण भेला आज जनता समाजवादी पार्टी (जसपा) नेपालको बालकुमारीस्थित पार्टी कार्यालयमा सम्पन्न भएको छ। भेलाले अग्रगामी मोर्चाको वैचारिक तथा बौद्धिक अभियानलाई देशव्यापी रूपमा विस्तार गर्ने उद्देश्यसहित १५ सदस्यीय बुद्धिजीवी समिति गठन गरेको छ।
भेलामा जसपा नेपालका अध्यक्ष उपेन्द्र यादव तथा नेपाल सङ्घीय समाजवादी पार्टीका अध्यक्ष एवं पूर्वगृहराज्यमन्त्री मो. रिजवान अन्सारीको विशेष उपस्थिति रहेको थियो। भेलामा मोर्चासँग आबद्ध विभिन्न राजनीतिक दल तथा बौद्धिक क्षेत्रका प्रतिनिधिहरूको सहभागिता रहेको थियो।
भेलालाई सम्बोधन गर्दै जसपा नेपालका अध्यक्ष उपेन्द्र यादवले मुलुकमा देखिएको वर्तमान राजनीतिक तथा सामाजिक संकटको निकास खोज्न र नेपाली जनताले लामो संघर्षबाट प्राप्त गरेका अधिकारहरूको संरक्षण गर्दै थप अधिकारका लागि संघर्ष गर्न अग्रगामी मोर्चा गठन गरिएको बताउनुभयो।
उहाँले अग्रगामी मोर्चामा आबद्ध बुद्धिजीवीहरूको भूमिका केवल सुझाव र सल्लाह दिनेमा सीमित नरहने भन्दै मोर्चाको वैचारिक आधार निर्माण, नीति तथा कार्यक्रम निर्माण र जनताको वास्तविक समस्यालाई राजनीतिक एजेण्डाका रूपमा स्थापित गर्न बुद्धिजीवीहरूको महत्वपूर्ण भूमिका रहने बताउनुभयो।
यादवले केन्द्रदेखि प्रदेश, जिल्ला हुँदै स्थानीय तहसम्म बुद्धिजीवीहरूको संगठन निर्माण गर्नुपर्नेमा जोड दिँदै मोर्चाको संगठनलाई देशव्यापी रूपमा विस्तार गरिने बताउनुभयो। उहाँले मुलुकलाई समृद्धि, सुशासन, सामाजिक न्याय र अधिकारको दिशामा अग्रसर गराउन वैचारिक रूपमा स्पष्ट र संगठित शक्ति आवश्यक रहेको धारणा राख्नुभयो।
सबै उत्पीडित समुदायको एकताबाट वैकल्पिक शक्ति निर्माण : रिजवान अन्सारी
भेलालाई सम्बोधन गर्दै नेपाल सङ्घीय समाजवादी पार्टीका अध्यक्ष एवं पूर्वगृहराज्यमन्त्री मो. रिजवान अन्सारीले वर्गीय, जातीय, क्षेत्रीय, लैंगिक, धार्मिक तथा विभिन्न प्रकारका उत्पीडनमा परेका सम्पूर्ण जनताको अधिकारका लागि एकताबद्ध संघर्ष आवश्यक रहेको बताउनुभयो।
अन्सारीले मुलुकका उत्पीडित तथा अधिकारबाट वञ्चित समुदाय र जनताको प्रतिनिधित्व गर्ने राजनीतिक शक्तिहरू एक ठाउँमा आएर अग्रगामी मोर्चा निर्माण गरिएको उल्लेख गर्दै यो मोर्चा क्रमिक रूपमा अझ सुदृढ हुँदै जाने बताउनुभयो।
उहाँले अग्रगामी मोर्चालाई केवल तत्कालीन राजनीतिक सहकार्यका रूपमा नभई नेपाली जनताका लागि दीर्घकालीन राजनीतिक वैकल्पिक शक्ति निर्माण गर्ने अभियानका रूपमा अघि बढाउनुपर्ने धारणा राख्नुभयो।
अन्सारीका अनुसार आगामी निर्वाचनमा मोर्चामा आबद्ध दलहरू एउटै चुनाव चिन्हबाट निर्वाचनमा सहभागी हुने दिशामा अघि बढ्ने र दीर्घकालीन रूपमा आबद्ध सबै दलहरूलाई एउटै राजनीतिक शक्तिका रूपमा रूपान्तरण गर्ने लक्ष्यसहित मोर्चा अगाडि बढिरहेको छ।
उहाँले भन्नुभयो, “नेपाली उत्पीडित जनताको राजनीतिक अधिकार, समानता, स्वतन्त्रता, सामाजिक न्याय र सम्मानजनक जीवनको सुनिश्चितताका लागि अग्रगामी मोर्चालाई एउटा बलियो राजनीतिक वैकल्पिक शक्तिका रूपमा स्थापित गर्नुपर्छ।”
जनहितविरोधी निर्णय नगर्न सरकारलाई आग्रह
अन्सारीले वर्तमान सरकारले जनहितविरोधी निर्णय गर्न नहुने भन्दै सरकारलाई देश र जनताप्रति समर्पित भएर काम गर्न आग्रह गर्नुभयो।
उहाँले नेपाली जनताका तत्कालीन मूल सवालहरूमा जनअधिकार, राष्ट्रिय स्वाधीनता, सुशासन, समानता र सामाजिक न्याय प्रमुख रहेको उल्लेख गर्दै यी सवालहरूको सम्बोधन गर्ने उद्देश्यसहित अग्रगामी मोर्चा अघि बढेको बताउनुभयो।
“जनताको अधिकार, राष्ट्रिय स्वाधीनता र सुशासनको सवाललाई केन्द्रमा राखेर अघि बढ्नुपर्छ,” अन्सारीले जोड दिनुभयो, “नेपाली जनताले देखेका समानता, न्याय र सम्मानपूर्ण जीवनका सपनालाई साकार पार्ने राजनीतिक अभियानका रूपमा अग्रगामी मोर्चालाई विकास गर्नुपर्छ।”
उहाँले मोर्चालाई केन्द्रदेखि प्रदेश र प्रदेशदेखि स्थानीय तहसम्म विस्तार गर्नुपर्ने तथा समाजका विभिन्न वर्ग र समुदायसँग सम्बन्धित जनवर्गीय संगठनहरूको समेत अग्रगामी मोर्चा निर्माण गर्नुपर्ने आवश्यकता औँल्याउनुभयो।
बुद्धिजीवीबाट नीति निर्माणमा महत्वपूर्ण योगदानको अपेक्षा
भेलाले अग्रगामी मोर्चाको आगामी राजनीतिक, वैचारिक तथा संगठनात्मक यात्रामा बुद्धिजीवीहरूको भूमिका महत्वपूर्ण हुने निष्कर्ष निकालेको छ। नवगठित १५ सदस्यीय समितिले मोर्चाको वैचारिक अभियानलाई व्यवस्थित बनाउने, नीति तथा कार्यक्रम निर्माणमा सुझाव दिने, जनताका समस्या र सरोकारलाई अध्ययन गरी राजनीतिक नेतृत्वसमक्ष प्रस्तुत गर्ने तथा देशभर बुद्धिजीवीहरूको संगठन विस्तारमा योगदान गर्ने अपेक्षा गरिएको छ।
भेलामा सहभागीहरूले अग्रगामी मोर्चालाई केवल राजनीतिक दलहरूको गठबन्धनमा सीमित नराखी अधिकार, समानता, सामाजिक न्याय, समावेशिता, संघीय लोकतान्त्रिक गणतन्त्र, धर्मनिरपेक्षता र राष्ट्रिय स्वाधीनताको पक्षमा व्यापक जनआधारित वैकल्पिक राजनीतिक शक्तिका रूपमा विकास गर्नुपर्ने धारणा राखेका थिए।
यससँगै अग्रगामी मोर्चाको वैचारिक र संगठनात्मक संरचना केन्द्रदेखि स्थानीय तहसम्म विस्तार गर्ने अभियानले थप गति लिने विश्वास व्यक्त गरिएको छ। मोर्चाले पछिल्ला दिनमा प्रदेश तथा विभिन्न तहमा संगठन विस्तारलाई प्राथमिकता दिँदै आएको सार्वजनिक विवरणहरूले पनि देखाउँछन्।
