काठमाडौं । काठमाडौं महानगरपालिकाको शिक्षा विभागले महानगर क्षेत्रभित्र सञ्चालित ९२ वटा संस्थागत (निजी) विद्यालयको अनुमति वा स्वीकृति रद्द गर्ने प्रक्रिया अघि बढाएको छ। विभागले अनुमति वा स्वीकृति रद्द गर्नुपर्ने अवस्थामा रहेका विद्यालयलाई आवश्यक कागजातसहित विवरण पेस गर्न ३५ दिने सूचना जारी गरेको हो।
विभागका अनुसार प्रचलित कानुनबमोजिम अनुमति वा स्वीकृति लिएर सञ्चालनमा रहेका तर हाल अनुमति वा स्वीकृति कायम राख्नुपर्ने अवस्था नरहेका विद्यालयलाई लक्षित गरी सूचना जारी गरिएको हो। सम्बन्धित विद्यालयले तोकिएको अवधिभित्र आवश्यक कागजात तथा आफ्नो पक्ष स्पष्ट हुने विवरण पेस गर्नुपर्नेछ।
शिक्षा विभागका प्रमुख नवराज ढकालले शिक्षा ऐन, २०७५ को दफा ३६ बमोजिम विद्यालयको अनुमति वा स्वीकृति रद्द गर्नुपर्ने अवस्था देखिएपछि प्रक्रिया अघि बढाइएको जानकारी दिए। उनका अनुसार ३५ दिनभित्र चित्तबुझ्दो जवाफ वा आवश्यक प्रमाण पेस नभएमा विद्यालयको अनुमति वा स्वीकृति रद्द गर्ने प्रक्रिया अघि बढाइनेछ।
यसअघि महानगरपालिकाले दर्ता भएर कागजमा मात्र सीमित रहेका तथा यथार्थमा सञ्चालनमा नरहेका संस्थागत विद्यालयको स्थलगत अनुगमन गरी अनुमति खारेजीको प्रक्रिया अघि बढाउने निर्णय गरेको थियो। नगर शिक्षा समितिको बैठकले पनि सञ्चालनमा नरहेका विद्यालयको अनुमति खारेज गर्ने प्रक्रिया अघि बढाउने निर्णय गरेको थियो। महानगरपालिकाले संस्थागत विद्यालयको सञ्चालन, कक्षा तथा विषय थप, नाम, स्थान र स्वामित्व परिवर्तनलगायत विषयमा प्रचलित कानुन तथा निर्धारित मापदण्डअनुसार नियमन गर्दै आएको जनाएको छ।
