काठमाडौँ । म्याग्दीमा लेदोसहितको पहिरो खस्दा बेनी–जोमसोम सडकखण्ड दुई स्थानमा पूर्ण रूपमा अवरुद्ध भएको छ। पहिरोका कारण सडकमा यातायात सञ्चालन प्रभावित भएको प्रहरीले जनाएको छ।
नेपाल प्रहरीका अनुसार अन्नपूर्ण गाउँपालिका–३, सुकेबगरमा शनिबार बिहान करिब ५ः२५ बजे सडक माथिबाट लेदो माटोसहितको पहिरो खसेको हो। पहिरोले सडक पूर्ण रूपमा अवरुद्ध भएको छ।
त्यस्तै, रघुगंगा गाउँपालिका–२, बैसरीमा पनि बिहान करिब ५ः३० बजे सडक माथिबाट लेदो माटोसहितको पहिरो खसेको प्रहरीले जनाएको छ। उक्त पहिरोका कारण सो स्थानमा पनि सडक पूर्ण रूपमा अवरुद्ध भएको छ।
दुवै स्थानमा पहिरो खसेपछि बेनी–जोमसोम सडकखण्ड भएर आवतजावत गर्ने सवारीसाधन प्रभावित भएका छन्। सडक अवरुद्ध भएपछि यात्रु तथा सवारीसाधन बाटोमै रोकिएका छन्।
