काठमाडौँ । सत्तारुढ दल राष्ट्रिय स्वतन्त्र पार्टी (रास्वपा)को केन्द्रीय समिति बैठक आज बस्ने भएको छ। पार्टीका महामन्त्री विपिनकुमार आचार्यका अनुसार बैठक बिहान ११ बजे पार्टी केन्द्रीय कार्यालय वनस्थलीमा बस्नेछ।
बैठकमा आगामी स्थानीय निर्वाचनका लागि ‘उम्मेदवार छनोट रूपरेखा–२०८३’ अनुमोदन गर्ने विषयमा छलफल हुने भएको छ। यस्तै ‘राइट टु रिकल’ सम्बन्धी दस्ताबेज निर्माण, सांगठनिक व्यवस्थापन तथा मनोनयनलगायत विषयमा पनि छलफल गरी आवश्यक निर्णय लिइने जनाइएको छ।
बैठकमा केन्द्रीय समिति सदस्य, पदाधिकारी तथा सचिवालय सदस्य मनोनयनका विषयमा पनि छलफल हुने बताइएको छ। त्यसैगरी विभिन्न विभागका प्रमुख मनोनयन तथा स्थानीय निर्वाचनका लागि केन्द्रीय उम्मेदवार छनोट समिति सदस्य मनोनयनसम्बन्धी प्रस्तावमाथि पनि छलफल हुने महामन्त्री आचार्यले जानकारी दिए।
रास्वपाले स्थानीय तहमा उम्मेदवार छनोट प्रक्रियालाई व्यवस्थित बनाउन केन्द्रीय समिति तथा प्रतिनिधिसभा सदस्य नेतृत्वमा उम्मेदवार छनोट रूपरेखा अभिमुखीकरण तथा प्रशिक्षण कार्यक्रम सञ्चालन गर्ने विषयलाई पनि बैठकको कार्यसूचीमा राखेको छ। यसबारे आवश्यक निर्णय बैठकले गर्नेछ।
यस्तै पार्टीको मुखपत्रका रूपमा ‘स्वतन्त्र’ मासिक डिजिटल पत्रिका प्रकाशन गर्ने प्रस्तावमाथि पनि छलफल हुने भएको छ। सांगठनिक संरचना, आगामी स्थानीय निर्वाचनको तयारी तथा पार्टीका विभिन्न जिम्मेवारीमा मनोनयनसँग सम्बन्धित विषयमा बैठकले महत्वपूर्ण निर्णय गर्ने अपेक्षा गरिएको छ।
