काठमाडौं । नेकपा (एमाले) नेता अबुल हुसेन अन्सारीले तीन वर्षीया अबोध बालिकाको बलात्कारपछि हत्या भएको घटनाले नेपाली समाज र राज्य व्यवस्थामाथि गम्भीर प्रश्न खडा गरेको बताएका छन्। उनले न्याय र अन्याय छुट्याउनसमेत नजान्ने उमेरकी बालिकामाथि भएको जघन्य अपराधले आफू स्तब्ध भएको भन्दै यस्ता घटनाले समाजको चेतनालाई नै हल्लाउनुपर्ने बताएका छन्।
अन्सारीले तीन वर्षीया बालिकासमेत सुरक्षित हुन नसक्ने अवस्था आएपछि नागरिकले आफू सुरक्षित छु भनेर कसरी महसुस गर्ने भन्ने प्रश्न गरेका छन्। उनले कानुनका ठेली, संसदका भाषण तथा महिला र बालबालिकाको अधिकार संरक्षणका ठूला प्रतिबद्धता भए पनि व्यवहारमा यस्ता अमानवीय घटना दोहोरिरहनुले राज्यको उपस्थिति र प्रभावकारितामाथि प्रश्न उठेको बताएका छन्।
उनले सरकारको मौनताप्रति पनि आक्रोश व्यक्त गरेका छन्। प्रधानमन्त्री बालेन शाह, महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्री सीता बादी तथा गृहमन्त्रीको भूमिकामाथि प्रश्न उठाउँदै अन्सारीले पीडित परिवारको घरसम्म पुगेर राज्यको उपस्थिति र संवेदना देखाउन आग्रह गरेका छन्। जनताका छोरीमाथि यस्ता जघन्य अपराध हुँदा सरकारको क्रिया, प्रतिक्रिया र सान्त्वना प्रभावकारी रूपमा देखिनुपर्ने उनको भनाइ छ।
अन्सारीले यो घटना एउटा परिवारको मात्र पीडा नभई सम्पूर्ण सभ्य समाजको लज्जा र राज्यको चौतर्फी असफलताको पराकाष्ठा भएको बताएका छन्। उनले दोषीलाई कानुनबमोजिम कडा सजाय दिलाउन सरकारसँग माग गर्दै यस्ता अपराधमा राज्यले कुनै पनि प्रकारको कमजोरी वा उदासीनता देखाउन नहुने बताएका छन्।
‘अब मौन बस्ने छुट कसैलाई छैन’ भन्दै अन्सारीले सडकदेखि सदनसम्म, प्रशासनदेखि न्यायालयसम्म सबैको ध्यान तत्काल यस्ता घटनातर्फ केन्द्रित हुनुपर्ने बताएका छन्। उनले सरकारलाई प्रश्न गर्दै भनेका छन्, ‘हे सरकार, तिम्रो मौनता कहिलेसम्म? हाम्रा छोरीहरूको सुरक्षाको ग्यारेन्टी कसले दिने?’
