आकाश मगर, उदयपुर । सरकारी सेवामा रहेर सेवाग्राहीसँग घुस मागेको आरोपमा उदयपुरका एक वन अधिकृत अख्तियार दुरुपयोग अनुसन्धान आयोगको टोलीबाट घुस रकमसहित रंगेहात पक्राउ परेका छन्। सेवाग्राहीसँग गैरकानुनी रूपमा रकम मागेको सूचनाका आधारमा अख्तियारले निगरानी बढाउँदै कारबाही अघि बढाएको हो।
अख्तियार दुरुपयोग अनुसन्धान आयोग, इटहरी कार्यालयको टोलीले डिभिजन वन कार्यालय उदयपुरका वन अधिकृत भुवन पौडेललाई १६ हजार २५० रुपैयाँ घुस रकमसहित पक्राउ गरेको जनाएको छ। सेवाग्राहीसँग घुसबापत उक्त रकम लिएको अवस्थामा उनलाई बिहीबार कार्यालय परिसरबाटै नियन्त्रणमा लिइएको हो।
प्राप्त विवरणअनुसार वन अधिकृत पौडेलले एक सेवाग्राहीसँग काम गरिदिने भन्दै घुस रकम मागेका थिए। घुस मागिएको विषयमा सेवाग्राहीले अख्तियारलाई जानकारी गराएपछि आयोगको इटहरीस्थित टोलीले आवश्यक प्रक्रिया पूरा गरी ‘स्ट्रिङ अपरेसन’ सञ्चालन गरेको थियो। सोही क्रममा पौडेललाई माग गरिएको रकमसहित पक्राउ गरिएको अख्तियारले जनाएको छ।
पक्राउ परेका पौडेललाई थप अनुसन्धानका लागि अख्तियार दुरुपयोग अनुसन्धान आयोगको इटहरी कार्यालयमा लगिएको छ। उनीमाथि घुस लिएको विषयमा आवश्यक अनुसन्धान भइरहेको र अनुसन्धानबाट प्राप्त तथ्य तथा प्रमाणका आधारमा थप कानुनी प्रक्रिया अघि बढाइने आयोगले जनाएको छ।
वन अधिकृत पौडेल गत मंसिरमा मात्रै उदयपुरमा पहिलो पदस्थापन भएर आएका थिए। सरकारी कार्यालयमा सेवाग्राहीलाई सहज र पारदर्शी रूपमा सेवा दिनुपर्ने जिम्मेवारीमा रहेका कर्मचारी नै घुस रकमसहित पक्राउ परेपछि घटनाले सरकारी सेवा प्रवाहमा हुने अनियमितता र भ्रष्टाचार नियन्त्रणको विषयलाई पुनः चर्चामा ल्याएको छ।
