काठमाडौं । नेपाल टेलिकमको खुद नाफा आर्थिक वर्ष २०८२/८३ मा ४७ दशमलव ५८ प्रतिशतले वृद्धि भएको छ। कम्पनीले सार्वजनिक गरेको वित्तीय विवरणअनुसार समीक्षा अवधिमा टेलिकमले ८ अर्ब ८६ करोड ४६ लाख रुपैयाँ खुद नाफा आर्जन गरेको हो। अघिल्लो आर्थिक वर्षमा कम्पनीको खुद नाफा ६ अर्ब ६७ करोड रुपैयाँ रहेको थियो।
कम्पनीको करअघिको नाफामा पनि उल्लेख्य वृद्धि भएको छ। आर्थिक वर्ष २०८२/८३ को चौथो त्रैमासिकसम्म करअघिको नाफा १३ अर्ब २६ करोड ४७ लाख रुपैयाँ पुगेको छ। यो अघिल्लो आर्थिक वर्षको ९ अर्ब ८५ करोड २ लाख रुपैयाँको तुलनामा ३ अर्ब ४१ करोड ४५ लाख रुपैयाँ अर्थात् ३४ दशमलव ६६ प्रतिशत बढी हो।
यस अवधिमा टेलिकमको कुल सञ्चालन आय पनि बढेको छ। कम्पनीले समीक्षा अवधिमा ३४ अर्ब ९५ करोड ४ लाख रुपैयाँ सञ्चालन आय गरेको छ। अघिल्लो आर्थिक वर्षको सोही अवधिमा यस्तो आय ३३ अर्ब ८९ करोड ४५ लाख रुपैयाँ थियो। यसअनुसार सञ्चालन आय १ अर्ब ५ करोड ५९ लाख रुपैयाँ अर्थात् ३ दशमलव १२ प्रतिशतले वृद्धि भएको हो। त्यस्तै, कम्पनीको कुल आय ३९ अर्ब १९ करोड ९६ लाख रुपैयाँ पुगेको छ, जुन अघिल्लो आर्थिक वर्षको ३८ अर्ब १८ करोड ८१ लाख रुपैयाँको तुलनामा २ दशमलव ६५ प्रतिशत बढी हो।
कम्पनीका अनुसार समीक्षा अवधिमा टेलिकमको ईबीआईटीडीए २० अर्ब ४८ करोड १ लाख रुपैयाँ पुगेको छ। यो अघिल्लो आर्थिक वर्षको तुलनामा १ अर्ब ९८ करोड ४१ लाख रुपैयाँ अर्थात् १० दशमलव ७३ प्रतिशत बढी हो। कम्पनीको वार्षिकीकरण गरिएको प्रतिसेयर आम्दानी ४९ रुपैयाँ २५ पैसा पुगेको छ। यद्यपि, ब्याजदर क्रमिक रूपमा घट्दै जाँदा टेलिकमको ब्याज आम्दानीमा भने कमी आएको छ। समीक्षा अवधिमा ब्याज आम्दानी ८६ करोड १९ लाख रुपैयाँ अर्थात् २२ दशमलव ८८ प्रतिशतले घटेको कम्पनीले जनाएको छ। अर्कोतर्फ, जीएसएम सेवातर्फको राजस्व भने ६४ करोड ५४ लाख रुपैयाँ अर्थात् २ दशमलव २८ प्रतिशतले वृद्धि भएको छ।
