काठमाडौं । नेपाल आयल निगमले शनिबार र आइतबार विभिन्न स्थानबाट गर्दै आएको खाना पकाउने एलपी ग्यासको बिक्री–वितरण आज सोमबारदेखि नगर्ने भएको छ। निगमले सम्बन्धित ग्यास उद्योगले नियुक्त गरेका विक्रेतामार्फत नियमित प्रक्रियाअनुसार ग्यास खरिद गर्न उपभोक्तालाई आग्रह गरेको छ।
निगमले शनिबार पाँच स्थान र आइतबार सात स्थानबाट एलपी ग्यास बिक्री–वितरण गरेको थियो। आजदेखि भने उपभोक्ताले आफूलाई पायक पर्ने ग्यास विक्रेतासँग सम्पर्क गरी ग्यास खरिद गर्नुपर्ने निगमले जनाएको छ। नजिकको विक्रेताबाट ग्यास प्राप्त गर्न नसकेका तथा तत्काल ग्यास आवश्यक भएका उपभोक्ताले निगमको क्विक रेस्पोन्स टिम (क्यूआरटी) मा सम्पर्क गर्न सक्नेछन्। त्यसका लागि ९८५१४५५१२४ र ९८५१४५५१२८ नम्बर उपलब्ध गराइएको छ।
ग्यास बिक्री–वितरणलाई व्यवस्थित बनाउन निगमले पाँचबुँदे व्यवस्था लागू गरेको छ। जसअनुसार ग्यास उद्योगले दैनिक बिक्री गर्ने विक्रेता तथा वितरकको नाम, ठेगाना, सम्पर्क नम्बर र सिलिन्डर संख्यासहितको विवरण प्रत्येक दिन बिहान ९ बजेभित्र निगमलाई उपलब्ध गराउनुपर्नेछ। त्यस्तै, विक्रेता तथा वितरकले बिक्री गरेको ग्यासको परिमाण, उपभोक्ताको नाम र सम्पर्क नम्बरसहितको विवरण दैनिक तयार गरी सम्बन्धित उद्योगलाई बुझाउनुपर्नेछ भने उद्योगले उक्त विवरण प्रत्येक सात दिनमा निगमलाई उपलब्ध गराउनुपर्ने व्यवस्था गरिएको छ।
निगमले अत्यावश्यक घरेलु प्रयोजनका लागि ग्यास प्रयोग गर्ने उपभोक्तालाई उच्च प्राथमिकतामा राखेर बिक्री–वितरण गर्न उद्योग तथा विक्रेतालाई निर्देशन दिएको छ। ग्यास ढुवानी तथा वितरणका क्रममा सुरक्षाका लागि सहजीकरण गर्न सम्बन्धित जिल्ला प्रशासन कार्यालयलाई गृह मन्त्रालयमार्फत अनुरोध गरिएको निगमले जनाएको छ। साथै, वाणिज्य, आपूर्ति तथा उपभोक्ता संरक्षण विभागसँगको समन्वयमा निगमबाट खटिएका जनशक्तिसहितको संयुक्त टोलीले ग्यास वितरणको अनुगमन गर्ने व्यवस्था मिलाइएको छ।
निगमले ग्यासको बिक्री–वितरणलाई सहज, व्यवस्थित र प्रभावकारी बनाउन सम्बन्धित उद्योग, विक्रेता तथा वितरकलाई तोकिएको व्यवस्था अनिवार्य रूपमा पालना गर्न आग्रह गरेको छ। उपभोक्तालाई पनि अनावश्यक भीड नगरी आफूलाई पायक पर्ने आधिकारिक विक्रेतामार्फत नियमित प्रक्रियाबाट ग्यास खरिद गर्न निगमले अनुरोध गरेको छ।
