बुटवल । लुम्बिनी प्रदेशका मुख्यमन्त्री चेतनारायण आचार्यले आज प्रदेशसभाबाट विश्वासको मत लिँदै छन्। सत्ता साझेदार नेपाली कांग्रेसले गत साउन १२ गते सरकारलाई दिएको समर्थन फिर्ता लिएपछि संवैधानिक व्यवस्थाअनुसार मुख्यमन्त्री आचार्यले विश्वासको मत लिन लागेका हुन्।
नेपाली कांग्रेसले नेकपा एमालेसँगको सत्ता सहकार्य तोड्ने निर्णय गरेपछि नेकपा एमालेका अध्यक्ष केपी शर्मा ओली र नेपाली कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’बीच सातै प्रदेशमा नयाँ सत्ता समीकरण बनाउने तीनबुँदे सहमति भएको थियो। उक्त सहमतिपछि कांग्रेसले लुम्बिनी प्रदेश सरकारमा सहभागी आफ्ना मन्त्रीहरूलाई फिर्ता बोलाएको थियो।
८७ सदस्यीय लुम्बिनी प्रदेशसभामा गत फागुनमा भएको निर्वाचनमा उम्मेदवार बन्न चार जना प्रदेशसभा सदस्यले राजीनामा दिएपछि हाल ८३ सदस्य कायम छन्। कायम सदस्य संख्याका आधारमा प्रदेशसभामा बहुमतका लागि ४२ सांसदको समर्थन आवश्यक पर्छ। हाल एमालेका २९ र नेकपाका सभामुखसहित १३ जना सांसद छन्।
सरकारलाई बहुमत जुटाउन एमाले अध्यक्ष ओली र नेकपा अध्यक्ष प्रचण्डले एक जना प्रदेशसभा सदस्य रहेको राष्ट्रिय जनमोर्चा (नेपाल कम्युनिस्ट पार्टी मसाल)सँग समेत सहमति गरेका छन्। त्यस्तै, वर्तमान सरकारमा लोकतान्त्रिक समाजवादी पार्टी (लोसपा) र जनता समाजवादी पार्टी नेपाल (जसपा नेपाल)बाट एक–एक जना मन्त्री सहभागी रहेकाले उनीहरूको समर्थन कायम रहे सरकारलाई सुविधाजनक बहुमत पुग्ने देखिन्छ।
एमाले र नेकपाबीच भएको सहमतिअनुसार लुम्बिनी प्रदेश सरकारको नेतृत्व एमालेले गर्ने र वर्तमान मुख्यमन्त्री आचार्यलाई नै निरन्तरता दिने समझदारी भएको छ। विश्वासको मत लिएपछि मात्रै सरकार विस्तार तथा मन्त्रालय बाँडफाँटको प्रक्रिया अघि बढाउने तयारी गरिएको छ।
मुख्यमन्त्री तथा मन्त्रिपरिषद्को कार्यालयबाहेक आठ वटा मन्त्रालय कायम रहेकाले नयाँ सत्ता समीकरणमा मन्त्रालय बाँडफाँट चुनौतीपूर्ण देखिएको छ। नेकपाले पाउने मन्त्रालयका विषयमा अझै सहमति जुट्न बाँकी रहेको नेकपाका प्रदेश संसदीय दलका नेता इन्द्रजित थारूले बताएका छन्। हाल मुख्यमन्त्रीसहित एमालेका पाँच, जसपा नेपालका एक र लोसपाका एक जना मन्त्री सरकारमा रहेका छन्।
