काठमाडौं । एनएमबी बैंक लिमिटेडले मनाङ जिल्लामा निर्माण भइरहेको ६५ मेगावाट क्षमताको दूध खोला जलविद्युत् आयोजनामा मुख्य लगानीकर्ताका रूपमा वित्तीय व्यवस्थापन गरेको छ। दूध खोला हाइड्रो पावर कम्पनी प्रालिद्वारा प्रवद्र्धित उक्त आयोजनामा एनएमबी बैंक अगुवा बैंकका रूपमा रहेको छ भने सानिमा बैंक लिमिटेड सह–अगुवा बैंकका रूपमा सहभागी रहेको छ।
आयोजनाको प्रमुख लगानीकर्तामा माउन्टेन इनर्जी नेपाल लिमिटेड तथा सीताराम तिमिल्सिना नेतृत्वको समूह रहेका छन्। आयोजनाको कुल अनुमानित लागत १२ अर्ब ९० करोड रुपैयाँ रहेको छ। सोमध्ये बैंक तथा वित्तीय संस्थाहरूले ९ अर्ब ६७ करोड रुपैयाँ ऋण लगानी गर्नेछन्।
ऋण सम्झौतामा एनएमबी बैंकका सहायक महाप्रबन्धक दिनेश दुलाल र दूध खोला हाइड्रो पावर कम्पनीका अध्यक्ष अरुण केसीले हस्ताक्षर गरेका छन्। एनएमबी बैंकले हालसम्म ५० भन्दा बढी जलविद्युत् आयोजनामा लगानी गरिसकेको जनाएको छ।
बैंकले नेपाल राष्ट्र बैंकद्वारा जारी वातावरणीय तथा सामाजिक जोखिम व्यवस्थापनसम्बन्धी निर्देशिका, २०२२ अनुरूप वातावरणीय तथा सामाजिक नीति तथा व्यवस्थापन प्रणाली कार्यान्वयन गर्दै आएको जनाएको छ। सोही क्रममा दूध खोला जलविद्युत् आयोजनाको वातावरणीय, सामाजिक तथा सुशासनसम्बन्धी पक्षको अध्ययन तथा मूल्याङ्कन गरिएको छ। अन्तर्राष्ट्रिय असल अभ्यासलाई आधार बनाउँदै हाइड्रोपावर सस्टेनेबिलिटी एलायन्स (एचएसए) द्वारा विकसित प्रारम्भिक वातावरणीय, सामाजिक तथा सुशासन परीक्षण उपकरणसमेत प्रयोग गरिएको बैंकले जनाएको छ।
