काठमाडौं । सिद्धार्थ बैंक लिमिटेडले गत आर्थिक वर्ष २०८२/०८३ को चौथो त्रैमाससम्म ३ अर्ब ५१ करोड ९४ लाख रुपैयाँ खुद नाफा आर्जन गरेको छ। बैंकले सार्वजनिक गरेको अपरिष्कृत वित्तीय विवरणअनुसार बैंकको खुद नाफा अघिल्लो आर्थिक वर्षको सोही अवधिको तुलनामा ४ दशमलव ५४ प्रतिशतले वृद्धि भएको हो। अघिल्लो आर्थिक वर्ष बैंकले ३ अर्ब ३६ करोड ६६ लाख रुपैयाँ खुद नाफा कमाएको थियो।
समीक्षा अवधिमा बैंकको खुद ब्याज आम्दानी ७ दशमलव २४ प्रतिशतले बढेर ९ अर्ब ५ करोड १२ लाख रुपैयाँ पुगेको छ। अघिल्लो आर्थिक वर्षको सोही अवधिमा यस्तो आम्दानी ८ अर्ब ४३ करोड ९८ लाख रुपैयाँ रहेको थियो। त्यस्तै, बैंकको खुद फि तथा कमिसन आम्दानी १७ दशमलव ६९ प्रतिशतले वृद्धि भई १ अर्ब ८६ करोड ४६ लाख रुपैयाँ पुगेको छ। अघिल्लो वर्ष यस्तो आम्दानी १ अर्ब ५८ करोड ४३ लाख रुपैयाँ थियो।
बैंकको कुल सञ्चालन आम्दानी पनि ८ दशमलव ५९ प्रतिशतले बढेर १२ अर्ब ५ करोड १६ लाख रुपैयाँ पुगेको छ। अघिल्लो आर्थिक वर्षमा कुल सञ्चालन आम्दानी ११ अर्ब ९ करोड ८६ लाख रुपैयाँ रहेको थियो। यसैगरी, बैंकको सञ्चालन नाफा ३ दशमलव ७८ प्रतिशतले बढेर ५ अर्ब १६ करोड २७ लाख रुपैयाँ पुगेको छ। अघिल्लो वर्ष सञ्चालन नाफा ४ अर्ब ९७ करोड ४८ लाख रुपैयाँ रहेको थियो।
बैंकको चुक्ता पुँजी १८ अर्ब २९ करोड ४४ लाख रुपैयाँ रहेको छ भने रिजर्भ तथा कोषमा १६ अर्ब ९२ करोड रुपैयाँ सञ्चित रहेको छ। बैंकको कुल सम्पत्ति अघिल्लो वर्षको ३ खर्ब ३८ अर्ब ८१ करोड रुपैयाँबाट बढेर ३ खर्ब ८९ अर्ब ७३ करोड रुपैयाँ पुगेको छ। समीक्षा अवधिमा बैंकको कर्जा लगानी २ खर्ब १४ अर्ब ४५ करोड ६४ लाख रुपैयाँबाट बढेर २ खर्ब ३३ अर्ब ८७ करोड २६ लाख रुपैयाँ पुगेको छ। त्यस्तै, निक्षेप संकलन २ खर्ब ८० अर्ब ३२ करोड १३ लाख रुपैयाँबाट बढेर ३ खर्ब २७ अर्ब १ करोड ६४ लाख रुपैयाँ पुगेको छ।
यद्यपि, बैंकको वितरणयोग्य नाफा भने घटेको छ। अघिल्लो आर्थिक वर्षमा १ अर्ब ८३ करोड ७८ लाख रुपैयाँ रहेको वितरणयोग्य नाफा समीक्षा अवधिमा घटेर १ अर्ब ७० करोड ५६ लाख रुपैयाँमा सीमित भएको छ। वित्तीय सूचकअनुसार बैंकको प्रतिसेयर आम्दानी २३ रुपैयाँ ६ पैसा तथा प्रतिसेयर नेटवर्थ २२५ रुपैयाँ १७ पैसा रहेको छ। बैंकको निष्क्रिय कर्जा अनुपात भने अघिल्लो वर्षको ० दशमलव ६६ प्रतिशतबाट बढेर १ दशमलव ०६ प्रतिशत पुगेको छ।
