भक्तपुर । चार दशकदेखि नेपाली रंगमञ्चमा सक्रिय रंगकर्मी जीतबहादुर देउजा (विजय विस्फोट) नेपाल संगीत तथा नाट्य प्रज्ञा प्रतिष्ठानको परिषद् सदस्यमा नियुक्त भएका छन् । संस्कृति, पर्यटन तथा नागरिक उड्डयन मन्त्रालयले साउन २२ गते उनलाई प्रतिष्ठानको परिषद् सदस्यमा नियुक्त गरेको हो । मन्त्रालयले सार्वजनिक गरेको नियुक्तिसम्बन्धी पत्रअनुसार देउजासहित विभिन्न क्षेत्रबाट नौ जना पदाधिकारी तथा परिषद् सदस्य नियुक्त भएका छन् ।
नेपाली रंगमञ्चमा लामो समयदेखि सक्रिय देउजा नाट्य क्षेत्रमा प्रयोगशील तथा स्पष्ट विचार राख्ने रंगकर्मीका रूपमा परिचित छन् । उनले आफ्नो चार दशक लामो रंगयात्रामा नेपाली रंगमञ्चमा विसंगतिवादी नाट्य शैलीका नयाँ प्रयोग गर्दै आएका छन् । अभिनय तथा नाट्य सिर्जनाका माध्यमबाट नेपाली रंगमञ्चको विकासमा योगदान पु¥याउँदै आएका देउजाले समकालीन नाट्य क्षेत्रमा आफ्नो छुट्टै पहिचान बनाएका छन् ।
देउजाको रंगयात्रा केवल नाट्य प्रस्तुतिमा मात्र सीमित छैन । नेपाल संगीत तथा नाट्य प्रज्ञा प्रतिष्ठानमा विगतमा भएका भनिएका अवैधानिक नियुक्तिविरुद्ध उनले लामो कानुनी संघर्षसमेत गरेका थिए । प्रतिष्ठानमा भएका नियुक्ति प्रक्रियामाथि प्रश्न उठाउँदै उनले करिब १४ वर्षसम्म कानुनी संघर्ष गरेको बताइन्छ । त्यस्तै, नेपाली रंगकर्मीहरूको हकहित र अधिकारका लागि संगठन निर्माणमा पनि देउजाको महत्वपूर्ण भूमिका रहेको छ । उनी नाट्यकर्मी महासंघका संस्थापक हुन् । देशभर छरिएर रहेका नाट्यकर्मीलाई संगठित गर्दै उनीहरूको पेशागत अधिकार तथा हकहितका लागि आवाज उठाउने अभियानमा देउजाले अग्रणी भूमिका निर्वाह गरेका थिए ।
चार दशक लामो रंगमञ्च यात्राका क्रममा उनले नेपाली रंगमञ्चका अग्रज तथा समकालीन नाट्यकर्मीहरूमाझ स्पष्ट र खरो विचार राख्ने तथा आफ्ना धारणा दृढतापूर्वक प्रस्तुत गर्ने जुझारु रंगकर्मीको पहिचान बनाएका छन् ।
नाट्यकर्मीका रूपमा सिर्जना, प्रयोग र अधिकारको पक्षमा निरन्तर सक्रिय रहेका देउजाको प्रतिष्ठानको परिषद् सदस्यमा नियुक्तिलाई नेपाली रंगमञ्चमा लामो समयदेखि सक्रिय रंगकर्मीको प्रतिनिधित्वका रूपमा समेत हेरिएको छ ।
मन्त्रालयले सार्वजनिक गरेको विवरणअनुसार ब्रेजेश खनाल प्रतिष्ठानको कुलपति, झुमा बनमे उपकुलपति तथा भूपेन्द्रसिंह रायमाझी सदस्य सचिव नियुक्त भएका छन् । त्यसैगरी छेन्दोक हाङ राई, सुभिमा श्रेष्ठ, सरस्वती चौधरी, राजन मुकारुङ र रेखा शाह गुरुङ परिषद् सदस्यमा नियुक्त भएका छन् ।
