काठमाडौं । महिला उद्यमशीलता प्रवर्द्धन र वित्तीय पहुँच विस्तार गर्ने उद्देश्यले सिद्धार्थ बैंकले ‘सिद्धार्थ महिला समृद्धि’ कर्जा योजना देशभरका सबै शाखामार्फत सञ्चालनमा ल्याएको छ। यस योजनाअन्तर्गत महिला स्वामित्व वा नेतृत्वमा सञ्चालित लघु, साना तथा मझौला उद्यमले अधिकतम १५ लाख रुपैयाँसम्म बिना धितो कर्जा प्राप्त गर्न सक्नेछन्। बैंकले २०८२ साउनदेखि ३० शाखाबाट परीक्षणका रूपमा सुरु गरेको योजना २०८३ साउनदेखि देशभर विस्तार गरेको जनाएको छ।
योजनाअनुसार बिना धितो १५ लाख रुपैयाँसम्म, आंशिक धितोमा २५ लाख रुपैयाँसम्म र पूर्ण धितो राख्ने महिला उद्यमीले ५० लाख रुपैयाँसम्म कर्जा लिन सक्नेछन्। नयाँ व्यवसाय सुरु गर्न चाहने महिलाले भने धितो अनिवार्य रूपमा उपलब्ध गराउनुपर्ने व्यवस्था गरिएको छ। बैंकले नेपाल राष्ट्र बैंकको सहुलियतपूर्ण ब्याजदर नीतिअनुसार कर्जा प्रवाह गर्ने र ग्राहकले मासिक, त्रैमासिक वा ओभरड्राफ्टमार्फत भुक्तानी गर्न सक्ने जनाएको छ।
बिना धितो कर्जाका लागि व्यवसाय कम्तीमा पाँच वर्षअघि दर्ता भएको तथा तीन वर्षदेखि निरन्तर सञ्चालनमा रहेको हुनुपर्नेछ। आंशिक धितोमा भने व्यवसाय तीन वर्षअघि दर्ता भई कम्तीमा दुई वर्षदेखि सञ्चालनमा रहेको भए पुग्नेछ। साथै, व्यवसायमा ५१ प्रतिशत वा सोभन्दा बढी महिला स्वामित्व भए स्वतः योग्य हुने, २० देखि ५० प्रतिशतसम्म महिला स्वामित्व भएका संस्थामा भने प्रमुख नेतृत्वमध्ये कम्तीमा एकजना महिला र सञ्चालक समितिमा एक महिला सदस्य अनिवार्य रहने व्यवस्था गरिएको छ।
वार्षिक पाँच करोड रुपैयाँसम्म कारोबार गर्ने लघु, साना तथा मझौला उद्यम मात्र यस योजनामा सहभागी हुन सक्नेछन्। कर्जा स्वीकृतिका लागि सन्तोषजनक वित्तीय अभिलेख आवश्यक रहनेछ। बिना धितो कर्जाका लागि पछिल्लो एक वर्षमा किस्ता भुक्तानीमा ढिलाइ नभएको र पछिल्ला दुई वर्षमा ३० दिनभन्दा बढी कर्जा भाखा नाघेको रेकर्ड हुन नहुने बैंकले जनाएको छ। आवश्यक कागजात पूरा भएमा बिना धितो कर्जा करिब एक साताभित्र र धितोसहितको कर्जा करिब दुई साताभित्र स्वीकृत गर्ने लक्ष्य राखिएको छ।
सिद्धार्थ बैंकले यस आर्थिक वर्षभित्र ‘महिला समृद्धि’ कर्जा योजनामार्फत कम्तीमा एक अर्ब रुपैयाँ कर्जा प्रवाह गर्ने लक्ष्य लिएको छ। पुँजी र धितोको अभावका कारण व्यवसाय विस्तार गर्न कठिनाइ भोगिरहेका महिला उद्यमीलाई वित्तीय पहुँच उपलब्ध गराउँदै उत्पादन वृद्धि, रोजगारी सिर्जना र महिला आर्थिक सशक्तीकरणमा टेवा पुर्याउने उद्देश्यले योजना सञ्चालन गरिएको बैंकले जनाएको छ।
