काठमाडौं । व्यवसायी दुर्गा प्रसाई र नेता डा. धवल शमशेर राणाको नेतृत्वमा नयाँ राजनीतिक दल ‘जय नेपाल पार्टी’ निर्वाचन आयोगमा दर्ता हुने भएको छ। नेता सगुन लावतीका अनुसार आगामी साउन २८ गते निर्वाचन आयोगमा पुगेर दल दर्ताको औपचारिक प्रक्रिया पूरा गर्ने निर्णय गरिएको हो।
लावतीका अनुसार प्रस्तावित नयाँ दलमा डा. धवल शमशेर राणालाई अध्यक्ष तथा दुर्गा प्रसाईलाई सर्वोच्च नेताको जिम्मेवारी दिने सहमति भएको छ। साउन २८ गते दल दर्ताका लागि आवश्यक सम्पूर्ण प्रक्रिया पूरा गरी निर्वाचन आयोगमा निवेदन दर्ता गरिने उनले बताए।
नयाँ पार्टीले राष्ट्रवादी विचारधारालाई आफ्नो प्रमुख एजेन्डा बनाउने जनाएको छ। साथै देशको समसामयिक राजनीतिमा प्रभावकारी र हस्तक्षेपकारी भूमिका निर्वाह गर्ने लक्ष्यसहित पार्टी गठन गर्न लागिएको नेताहरूको दाबी छ।
लामो समयदेखि छुट्टाछुट्टै राजनीतिक अभियान र संगठनमा सक्रिय रहेका प्रसाई र राणाबीचको यो सहकार्यलाई राजनीतिक वृत्तमा चासोका साथ हेरिएको छ। विशेषगरी राष्ट्रवादी शक्तिहरूलाई एकीकृत गर्ने उद्देश्यका साथ ‘जय नेपाल पार्टी’ गठन गर्न लागिएको बताइएको छ।
