श्रीराम रानाभाट दुबई, यूएई – कास्की आदर्श समाज, यूएईको आयोजनामा बहुप्रतिक्षित “सातौं कास्की आदर्श वाइवाइ कप भलिबल प्रतियोगिता” हिजो मिति २ अगस्ट, आइतबारका दिन दुबईको स्पाटा स्पोर्ट्स क्लब, अल-खवानीजमा भव्य रूपमा सम्पन्न भएको छ।
१६ टिमको उत्साहजनक सहभागिता रहेको यो प्रतियोगिता निर्धारित समयभन्दा केही ढिला सुरु भए तापनि दिनभर चलेका सम्पूर्ण खेलहरू अत्यन्तै प्रतिस्पर्धात्मक, रोमाञ्चक र दर्शकहरुलाई अन्तिमसम्म बाँधेर राख्ने खालका रहे। परदेशको व्यस्तताका बाबजुद पनि खेल मैदानमा ओइरिएको दर्शकको घुइँचोले कार्यक्रमको गरिमालाई अझ बढाएको थियो।
सभापतित्व र प्रमुख अतिथि
सिजी ग्रुपको मुख्य प्रायोजन (Title Sponsor) मा सम्पन्न उक्त प्रतियोगिताको सभापतित्व समाजका अध्यक्ष शिवराज बस्ताकोटीले गरेका थिए भने प्रमुख अतिथिको रूपमा सिजी ग्रुपका फाइनान्सियल हेड दिपेश हमालले गरेका थिए ।
कार्यक्रमको समुद्घाटन सभापति, प्रमुख अतिथि एवं सम्पूर्ण अतिथिहरूद्वारा खेलाडीहरूलाई बल हस्तान्तरण तथा ब्यानरमा हस्ताक्षर गरी गरिएको थियो। यस अवसरमा को-स्पोन्सर स्टार म:मका सञ्चालकद्वय विकास शाही एवं भुवानी प्रसाद तिमल्सिना लगायत यूएईमा क्रियाशील विभिन्न संघ-संस्थाका प्रतिनिधिहरू, समाजसेवी, पत्रकार तथा खेलप्रेमी महानुभावहरूको बाक्लो उपस्थिति रहेको थियो।
प्रतियोगिताको नतिजा:
कडा प्रतिस्पर्धालाई पछि पार्दै यस संस्करणको उपाधि परदेशी हातेमालो भलिबल टिमले चुम्न सफल भएको छ। फाइनलमा उत्कृष्ट प्रदर्शन गर्दै परदेशी हातेमालो प्रथम हुन सफल भएको हो।
त्यसैगरी निकै प्रतिस्पर्धात्मक फाइनल भिडन्तमा रुपन्देही बुटवल भलिबल टिम द्वितीय हुन पुगेको छ। तृतीय अर्थात सान्त्वना पुरस्कार दुई टिमले प्राप्त गरेका छन्, जसमा आयोजक कास्की आदर्श समाज भलिबल टिम र तनहुँ सेवा समाज भलिबल टिम रहेका छन्।
विजेता टिमले नगद दिराम ५००० सहित कप, मेडल र प्रमाणपत्र तथा उपविजेताले नगद दिराम ३००० सहित कप, मेडल र प्रमाणपत्र प्राप्त गरे भने सान्त्वना टिमलाई जनही नगद ८०० सहित सम्मान गरिएको थियो।
विधागत पुरस्कारमा चम्किएका ताराहरू:
आयोजकको तर्फबाट खेलाडीहरूको व्यक्तिगत प्रदर्शनको मूल्याङ्कन गरी विभिन्न विधामा सम्मान गरिएको थियो, जस अनुसार
• बेस्ट ब्लकर: निकेश महत
• बेस्ट स्पाइकर: सुनिल ढकाल
• बेस्ट लिबेरो: सागर लामिछाने
• बेस्ट सर्भर: मिलन चन्द ठकुरी
• बेस्ट सेटर: बिनोद नेपाली
• बेस्ट प्लेयर अफ द टुर्नामेन्ट: मनिष मानन्धर
• बेस्ट कोच: आशिष कुँवर, लाई प्रदान गरिएको थियो । खेलाडीहरुमा थप हौसला मिलोस् भन्ने हेतुले विधागत रूपमा सम्मान गरिएको जानकारी प्रतियोगिता संयोजक सन्तोष गुरुङले दिएका थियो ।
आभार तथा धन्यवाद:
यस ऐतिहासिक सातौं संस्करणलाई सफल पार्न आर्थिक, नैतिक र भौतिक रूपमा सहयोग गर्नुहुने टाइटल स्पोन्सर सिजी ग्रुप / वाइवाइ चाउचाउ परिवार, को-स्पोन्सर स्टार मम लगायत सम्पूर्ण व्यावसायिक प्रायोजकहरू तथा व्यक्तिगत सहयोगदाताहरूप्रति कास्की आदर्श समाजले हार्दिक धन्यवाद व्यक्त गर्नुका साथै, यस कार्यक्रमलाई सफल पार्न महत्वपूर्ण भूमिका निर्वाह गर्नुहुने प्रतियोगिता संयोजक, खेलकुद संयोजक, आर्थिक संयोजक लगायत दिनरात अहोरात्र खटिएका समाजका सम्पूर्ण सामाजिक व्यक्तित्वहरू, स्वयंसेवकहरु र प्रत्यक्ष अप्रत्यक्ष रूपमा सहयोग गर्ने सम्पूर्णमा कार्यक्रमका सभापति, प्रमुख अतिथि तथा वक्ताहरूले आफ्नो वक्तव्यका क्रममा आभार प्रकट गरेका थिए ।
कास्की आदर्श समाज यूएईले आगामी दिनहरूमा पनि यस्तै रचनात्मक कार्यक्रमहरू आयोजना गर्दै जाने र यस्तै निरन्तर सहयोग र सद्भावको अपेक्षा कार्यक्रमका सभापति तथा समाजका अध्यक्ष बस्ताकोटीले कार्यक्रम समापनको अवसरमा प्रकट गरेका थिए ।
