श्रीराम रानाभाट दुबई, युएई — प्रवासमा रहेर पनि आफ्नो जन्मभूमि कास्कीको पहिचान र नेपाली एकतालाई जोगाइरहेको संस्था कास्की आदर्श समाज यूएईले आफ्नो वार्षिक खेलकुद उत्सवको रुपमा रहेको प्रतिष्ठित “सातौं कास्की कप भलिबल प्रतियोगिता” आयोजना गर्ने भएको छ।
समाजले दिएको जानकारी अनुसार प्रतियोगिता यही अगष्ट ०२ तारिख, आइतबारका दिन दुबईस्थित स्पाटा स्पोर्ट्स क्लब, अल खवानीजमा भव्य रुपमा सञ्चालन हुनेछ। बिहानैदेखि सुरु हुने यस खेलउत्सवमा यूएईका विभिन्न इमिरेट्सबाट १६ टिमको सहभागिता रहने निश्चित भएको छ।
प्रवासी नेपाली समुदायमा भलिबलप्रतिको क्रेज र युवाहरुमा बढ्दो उत्साहलाई मध्यनजर गर्दै विगत केही वर्षदेखि निरन्तर आयोजना हुँदै आएको कास्की कप यस वर्ष अझ बढी व्यवस्थित र प्रतिस्पर्धात्मक हुने आयोजकले जनाएको छ।
मुख्य प्रायोजकमा वाइवाइ चाउचाउ:
यस वर्षको प्रतियोगिताको मुख्य प्रायोजकको रुपमा नेपालीहरुको जिब्रोमा झुण्डिएको ब्रान्ड वाइवाइ चाउचाउ रहेको छ। प्रवासमा नेपाली कला, संस्कृति र खेलकुदलाई माया गरेर सहयोग गरेकोमा आयोजक संस्थाले वाइवाइ परिवार तथा ब्रान्ड मेनेजर गणेश बास्तोलालाई विशेष धन्यवाद व्यक्त गरेको छ। वाइवाइको साथले प्रतियोगितालाई थप उचाइ र ऊर्जा मिलेको समाजका खेलकुद संयोजकले बताउनुभयो।
आकर्षक पुरस्कार राशि:-
खेललाई थप रोमाञ्चक र प्रतिस्पर्धात्मक बनाउन आयोजकले आकर्षक पुरस्कारको व्यवस्था गरेको छ।
यस प्रतियोगितामा प्रथम हुने विजेता टिमले नगद दिराम ५,०००/ सहित कप, मेडल र प्रमाणपत्र प्राप्त गर्नेछ भने द्वितीय हुने उपविजेता टिमले नगद दिराम ३,०००/ सहित कप, मेडल र प्रमाणपत्र प्राप्त गर्नेछ।
त्यस्तै सेमिफाइनलसम्म पुगेर पराजित हुने दुई सान्त्वना टिमलाई पनि हौसला स्वरुप जनही नगद दिराम ८००/८०० सहित मेडल र प्रमाणपत्र प्रदान गरिने आयोजक समितिले जानकारी दिएको छ।
एकताको पर्व बन्दै कास्की कप:-
यो केवल भलिबल प्रतियोगिता मात्र नभएर यूएईमा छरिएर रहेका कास्केली तथा सम्पूर्ण नेपालीहरु बिच भाइचाराको सम्बन्ध गाढा बनाउने एकताको पर्व बन्दै गएको छ।
समाजका एक पदाधिकारीले भने, “हामी परदेशमा छौं, कामको व्यस्तताले थाकेका मनहरुलाई एकछिन भएपनि रमाइलो गराउन, युवाहरुलाई कुलतबाट जोगाएर खेलकुदतर्फ आकर्षित गर्न र हाम्रो राष्ट्रिय खेल भलिबलको जगेर्ना गर्न हामीले यो प्रतियोगिता निरन्तर गरिरहेका हौं।”
साथै युएईमा रहेका सम्पूर्ण खेलप्रेमी, समाजसेवी, पत्रकार तथा नेपाली दाजुभाइ दिदीबहिनीहरुलाई उपस्थित भएर खेलको शोभा बढाइदिन र खेलाडीहरुको हौसला बढाइदिन आयोजकले हार्दिक अनुरोध गरेको छ ।
प्रतियोगिताको सम्पूर्ण तयारी अन्तिम चरणमा पुगेको र खेल तालिका, अम्पायर तथा व्यवस्थापन टोली तयारी अवस्थामा रहेको आयोजकले जनाएको छ। भोलिको घामसँगै अल खवानीजमा नेपाली युवाहरुको जोश, जाँगर र भलिबलको रोमाञ्चक भिडन्त हेर्न पाइनेछ ।
