काठमाडौं । सम्माननीय सभामुख डीपी अर्यालले प्रतिनिधिसभाअन्तर्गतका संसदीय समितिका सभापति तथा सचिवहरूसँग छलफल गर्दै समितिहरूको कामकारबाहीलाई थप प्रभावकारी, परिणाममुखी र समयबद्ध बनाउन आवश्यक रहेको बताउनुभएको छ। छलफलमा समितिहरूको कार्यसम्पादन, विधेयक व्यवस्थापन, अनुगमन तथा संस्थागत सुधारका विषयमा विस्तृत विचारविमर्श भएको थियो।
छलफलपछि सभामुख अर्यालले समितिहरूले अवलोकन तथा अनुगमनका क्रममा स्पष्ट कार्यविधि, उद्देश्य र कार्ययोजनाका आधारमा अघि बढ्नुपर्नेमा जोड दिनुभयो। उहाँले कानुन र विधिको पूर्ण पालना गर्दै तथ्यमा आधारित अनुगमन गर्न आग्रह गर्दै निश्चित कार्यविवरण तयार गरेर मात्रै अनुगमनमा जानुपर्ने बताउनुभयो।
उहाँले सरकारलाई सुझाव तथा सल्लाह प्रदान गर्दा पनि समितिहरूले आफ्नो संवैधानिक तथा कानुनी क्षेत्राधिकारभित्र रहेर तथ्यपरक, व्यावहारिक र कार्यान्वयनयोग्य सुझाव दिनुपर्ने उल्लेख गर्नुभयो। यसबाट संसदीय समितिहरूको भूमिका अझ प्रभावकारी र उत्तरदायी बन्ने विश्वास व्यक्त गर्नुभयो।
सभामुख अर्यालले विभिन्न विधेयकहरू लामो समयसम्म समितिमा रोकिराख्ने प्रवृत्तिको अन्त्य गर्न आग्रह गर्दै विधेयकहरूलाई समयमै टुंगोमा पुर्याउन निर्देशन दिनुभयो। साथै, पर्याप्त, गहन र गुणस्तरीय छलफल गरी आवश्यक संशोधनसहित विधेयकलाई प्रतिनिधिसभामा पेश गर्नुपर्नेमा उहाँले जोड दिनुभयो।
छलफलमा संसदीय समितिहरूलाई प्रविधिमैत्री, स्रोत–साधन सम्पन्न तथा थप सक्षम बनाउने विषयमा पनि विचारविमर्श भएको थियो। समितिहरूको कार्यसम्पादनलाई अझ प्रभावकारी बनाउने उपायबारे सभापति तथा सचिवहरूले आफ्ना सुझाव तथा धारणा प्रस्तुत गरेका थिए। सभामुखले प्राप्त सुझावलाई संसदीय समितिहरूको कार्यक्षमता अभिवृद्धिका लागि उपयोग गरिने विश्वास व्यक्त गर्नुभयो।
