काठमाडौं । कुमारी बैंक लिमिटेडको गौमुल शाखाले आफ्नो परिवार सुरक्षा बचत खाता अन्तर्गतको बीमा सुविधामार्फत लाभग्राहीलाई १० लाख रुपैयाँ बराबरको बीमा दाबी रकम हस्तान्तरण गरेको छ।
दुर्घटनामा श्रीमती बना देवी बोहराका श्रीमानको निधन भएपछि आवश्यक कानुनी तथा बैंकिङ प्रक्रिया पूरा गरी उक्त बीमा रकम हस्तान्तरण गरिएको बैंकले जनाएको छ। बैंकका अनुसार यस आर्थिक सहयोगले शोकाकुल परिवारलाई कठिन परिस्थितिमा केही राहत पुग्ने विश्वास गरिएको छ।
ग्राहकको वित्तीय सुरक्षा र परिवारको आर्थिक संरक्षणलाई प्राथमिकतामा राख्दै कुमारी बैंकले विभिन्न बचत योजनामार्फत बीमा सुविधा उपलब्ध गराउँदै आएको छ। परिवार सुरक्षा बचत खाताअन्तर्गत प्रदान गरिने बीमा सुविधाले अप्रत्याशित घटनाबाट प्रभावित परिवारलाई आर्थिक सहारा पुर्याउने बैंकको विश्वास छ।
बैंकका अनुसार यस्ता योजनाले विशेषगरी ग्रामीण तथा दुर्गम क्षेत्रका नागरिकसम्म वित्तीय सेवा र बीमा सुरक्षाको पहुँच विस्तार गर्न सहयोग पुर्याउँदै आर्थिक समावेशीकरणलाई थप मजबुत बनाउने अपेक्षा गरिएको छ।
विगत २५ वर्षदेखि बैंकिङ सेवा प्रदान गर्दै आएको कुमारी बैंक लिमिटेडले हाल देशभर २८५ शाखा, ४१ विस्तार काउन्टर, ३०२ एटीएम तथा ४० शाखारहित बैंकिङ सेवा केन्द्रमार्फत ग्राहकलाई सेवा प्रदान गर्दै आएको छ। सुरक्षित, सहज र गुणस्तरीय बैंकिङ सेवा विस्तारसँगै ग्राहकको वित्तीय सुरक्षालाई थप सुदृढ बनाउने उद्देश्यले बैंकले विभिन्न निक्षेप, बीमा तथा आधुनिक बैंकिङ सेवाहरू सञ्चालन गरिरहेको जनाएको छ।
