काठमाडौं । काठमाडौंको टुसालस्थित पाँचतारे हायात रेजेन्सी काठमाडौं जेनजी आन्दोलनका क्रममा होटल परिसर तथा विभिन्न संरचनामा व्यापक क्षति पुगेपछि हाल अस्थायी रूपमा बन्द छ। होटलको मुख्य प्रवेशद्वार सुनसान देखिएको छ भने पाहुना सेवा पूर्ण रूपमा रोकिएको छ। होटल व्यवस्थापनले आफ्नो आधिकारिक वेबसाइटमार्फत पनि होटल अस्थायी रूपमा बन्द रहेको सूचना सार्वजनिक गरेको छ।
जेनजी आन्दोलनका क्रममा प्रदर्शनकारीहरूले निजी तथा सार्वजनिक संरचनामाथि आक्रमण गर्दा हायात होटल पनि प्रभावित भएको थियो। होटलका भवन, सेवा संरचना र अन्य भौतिक सम्पत्तिमा क्षति पुगेपछि सुरक्षा अवस्था तथा मर्मतसम्भारलाई ध्यानमा राख्दै सञ्चालन स्थगित गरिएको जनाइएको छ। यद्यपि क्षतिको आधिकारिक आर्थिक विवरण भने सार्वजनिक गरिएको छैन।
हायात रेजेन्सी काठमाडौं नेपालकै प्रमुख पाँचतारे होटलमध्ये एक हो। बौद्धनाथ स्तूप नजिक ३७ एकड क्षेत्रफलमा फैलिएको यस होटलमा २८० कोठा, सम्मेलन हल, रेस्टुरेन्ट तथा अन्तर्राष्ट्रियस्तरका सेवा–सुविधा उपलब्ध छन्। होटल बन्द हुँदा पर्यटन, होटल व्यवसाय, रोजगारी र अन्तर्राष्ट्रिय कार्यक्रमहरूमा समेत प्रत्यक्ष असर परेको सरोकारवालाहरूले बताएका छन्।
होटल व्यवस्थापनले भवन तथा पूर्वाधारको प्राविधिक मूल्याङ्कन, मर्मतसम्भार र सुरक्षा व्यवस्थापन पूरा भएपछि मात्र सञ्चालनबारे निर्णय गरिने जनाएको छ। हालसम्म पुनः सञ्चालन हुने निश्चित मिति सार्वजनिक गरिएको छैन।
जेनजी आन्दोलनका क्रममा हायात होटल मात्र होइन, काठमाडौंका अन्य निजी तथा सार्वजनिक संरचनाहरूमा पनि तोडफोड, आगजनी र व्यापक क्षति भएको थियो। त्यसपछि सरकारले प्रभावित क्षेत्रहरूको क्षति मूल्याङ्कन, पुनःनिर्माण तथा घटनाको अनुसन्धानलाई अघि बढाइरहेको जनाएको छ।
