काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले सुनसरीको देवानगञ्जमा विकसित पछिल्लो घटनाक्रमलगायत समसामयिक राष्ट्रिय विषयमा छलफल गर्न सर्वदलीय बैठक आह्वान गर्नुभएको छ।
उहाँले बुधबार बिहान ८ बजे सिंहदरबारस्थित लेखा समितिको बैठक कक्षमा सर्वदलीय छलफल आयोजना गर्नुभएको हो। बैठकमा संघीय संसदमा प्रतिनिधित्व गर्ने सबै राजनीतिक दललाई आमन्त्रण गरिएको जनाइएको छ।
यस्तै, संसदबाहिर रहेका प्रमुख राजनीतिक दलका नेताहरूलाई पनि छलफलमा सहभागी हुन निमन्त्रणा गरिएको छ। उपेन्द्र यादव नेतृत्वको जनता समाजवादी पार्टी, महन्थ ठाकुर नेतृत्वको लोकतान्त्रिक समाजवादी पार्टी तथा सीके राउत नेतृत्वको जनमत पार्टीलाई पनि बैठकमा बोलाइएको छ।
रास्वपाका अनुसार सुनसरी घटनालगायत राष्ट्रिय महत्वका विषयमा साझा धारणा निर्माण गर्दै आवश्यक निष्कर्षमा पुग्ने उद्देश्यले सर्वदलीय बैठक आह्वान गरिएको हो। बैठकबाट पछिल्लो घटनाक्रमबारे राजनीतिक दलहरूबीच समन्वय र आवश्यक कदमका विषयमा छलफल हुने अपेक्षा गरिएको छ।
