भक्तपुर। प्रतिनिधिसभा सदस्य राजीव खत्रीले मध्यपुर थिमि नगरपालिका–१ मा स्थानीय बासिन्दासँग प्रत्यक्ष भेटघाट तथा अन्तरक्रिया कार्यक्रम सञ्चालन गरेका छन्।
कार्यक्रमका क्रममा सांसद खत्रीले स्थानीयवासीका जनगुनासा, सुझाव तथा विभिन्न समस्या प्रत्यक्ष रूपमा सुनेका थिए। स्थानीयले सडक, खानेपानी, पूर्वाधार विकास, सार्वजनिक सेवा प्रवाहलगायतका विषयमा आफ्ना धारणा र माग प्रस्तुत गरेका थिए।
भेटघाटका क्रममा सांसद खत्रीले उठाइएका समस्याको सम्बन्धित निकायसँग समन्वय गरी आवश्यक सम्बोधन तथा समाधानका लागि पहल गर्ने प्रतिबद्धता व्यक्त गरे। उनले जनप्रतिनिधिको मुख्य दायित्व नागरिकका समस्या सुन्ने र समाधानका लागि प्रभावकारी रूपमा काम गर्नु रहेको बताए।
स्थानीय बासिन्दाले जनप्रतिनिधि स्वयं समुदायमा आएर प्रत्यक्ष रूपमा समस्या सुन्ने कार्य सकारात्मक भएको प्रतिक्रिया दिएका थिए। यस्ता कार्यक्रमले जनप्रतिनिधि र नागरिकबीचको सम्बन्ध थप सुदृढ हुने विश्वास व्यक्त गरिएको छ।
