विराटनगर । नेकपा (एमाले) र नेपाली कम्युनिस्ट पार्टीबीच नयाँ सत्ता समीकरण बनेसँगै कोशी प्रदेश सरकारको नेतृत्व परिवर्तन हुने संकेत देखिएको छ। एमाले उच्च स्रोतका अनुसार हालका मुख्यमन्त्री हिक्मतकुमार कार्कीको स्थानमा एमाले संसदीय दलका उपनेता तिलकुमार मेन्याङ्बोलाई मुख्यमन्त्री बनाउने तयारी अन्तिम चरणमा पुगेको छ। यसबारे केन्द्रीय नेतृत्वले आइतबार नै अन्तिम निर्णय गर्न सक्ने बताइएको छ।
सत्ता साझेदारीसम्बन्धी सहमतिअनुसार कोशी, बागमती र लुम्बिनी प्रदेश सरकारको नेतृत्व एमालेले गर्नेछ भने कर्णाली र सुदूरपश्चिम प्रदेश सरकारको नेतृत्व नेपाली कम्युनिस्ट पार्टीले गर्ने सहमति भएको स्रोतको दाबी छ। सोही सहमतिअनुसार कोशी प्रदेश सरकार पुनर्गठनको गृहकार्य पनि तीव्र रूपमा अघि बढाइएको बताइएको छ।
हाल काठमाडौंमा रहेका मेन्याङ्बोले टेलिफोन संवादमा आफू मुख्यमन्त्री बन्ने सम्भावना अत्यन्त बलियो रहेको प्रतिक्रिया दिएका छन्। “लगभग मेरो सम्भावना बलियो देखिएको छ। केन्द्रीय नेतृत्व सकारात्मक रहेकाले म विश्वस्त छु,” उनले भने।
एमाले स्रोतका अनुसार पार्टी अध्यक्ष केपी शर्मा ओलीले कोशी प्रदेशको नेतृत्व परिवर्तनलाई प्राथमिकतामा राखेका छन्। पछिल्लो समय ओली र मुख्यमन्त्री कार्कीबीच सम्बन्ध सहज नरहेको र त्यसको प्रभाव नेतृत्व परिवर्तनको निर्णयमा परेको दाबी एक प्रदेश सांसदले गरेका छन्। उनका अनुसार यसपटक नयाँ नेतृत्वलाई अवसर दिने पक्षमा केन्द्रीय नेतृत्व देखिएको छ।
ताप्लेजुङ–१ (१) बाट निर्वाचित मेन्याङ्बो एमाले प्रदेश संसदीय दलका उपनेता हुन्। कार्की नेतृत्वको पहिलो प्रदेश सरकारमा उनले खानेपानी, सिँचाइ तथा ऊर्जा मन्त्रीको जिम्मेवारी सम्हालेका थिए। त्यसपछि मन्त्रिपरिषद् पुनर्गठनका क्रममा स्वास्थ्य मन्त्रालयको जिम्मेवारी पनि निर्वाह गरेका थिए। उनी २०५६ सालमा ताप्लेजुङबाट प्रतिनिधिसभा सदस्य निर्वाचित भई राष्ट्रिय राजनीतिमा सक्रिय भएका नेता हुन्।
यता एमाले कोशी प्रदेशका प्रमुख सचेतक रमेश बस्नेतले भने मुख्यमन्त्री परिवर्तनबारे प्रदेश कमिटीमा औपचारिक छलफल नभएको बताएका छन्। उनका अनुसार प्रदेश तहबाट निर्णय हुँदा हिक्मतकुमार कार्कीलाई नै निरन्तरता दिने सम्भावना रहन सक्छ, तर केन्द्रीय नेतृत्वले नयाँ निर्णय गरेमा नेतृत्व परिवर्तन हुने सम्भावना बलियो छ।
