काठमाडौं। नेपाली मूलका वरिष्ठ कराते प्रशिक्षक सिहान शान्त थोकर अमेरिकामा करातेको प्रतिष्ठित सातौँ डान (Kyoshi) प्राप्त गर्ने पहिलो नेपाली बनेका छन्। अमेरिकाको वासिङ्टन राज्यको सियाटलमा जुलाई १७ मा सम्पन्न यूएसए नेशनल कराते–डो च्याम्पियनसिप का अवसरमा उनलाई उक्त सम्मान प्रदान गरिएको हो।
पेन्सिल्भेनियाको ल्यानकास्टर निवासी थोकरलाई कराते–डोको विकास, अन्तर्राष्ट्रिय स्तरमा नेपाली करातेको पहिचान स्थापित गर्न पुर्याएको योगदान, दीर्घकालीन साधना तथा प्रशिक्षकका रूपमा खेलेको भूमिकाको उच्च मूल्यांकन गर्दै सातौँ डान प्रदान गरिएको हो। उक्त सम्मान यूएसए नेशनल कराते–डो फेडरेशनकी अध्यक्ष एलिसा आउद्वारा हस्ताक्षरित प्रमाणपत्रमार्फत प्रदान गरिएको हो।
सातौँ डान प्राप्त गरेपछि समाज टाइम्ससँग प्रतिक्रिया दिँदै थोकरले भने, “छैटौँ डानपछि सातौँ डान प्राप्त गर्न केही वर्ष ढिला भयो। तर ४५ वर्षभन्दा लामो कराते यात्राको मूल्यांकन भएकोमा अत्यन्त खुसी छु। यो उपलब्धि मेरो मात्र होइन, सम्पूर्ण नेपाली कराते समुदायको गौरव हो।”
करातेमा ब्ल्याक बेल्टपछि प्राप्त हुने उच्च तहलाई डान भनिन्छ। सातौँ डानलाई ‘क्योसी (Kyoshi)’ अर्थात् गुरु तथा विशेषज्ञ प्रशिक्षकको स्तर मानिन्छ। यस तहमा पुग्न उत्कृष्ट प्राविधिक क्षमता मात्र नभई करातेको दर्शन, शिक्षण, नेतृत्व तथा खेल विकासमा दीर्घकालीन योगदानको मूल्यांकन गरिन्छ। सामान्यतः छैटौँ डानपछि सातौँ डान प्राप्त गर्न कम्तीमा ६–७ वर्षको निरन्तर साधना र योगदान आवश्यक पर्ने अन्तर्राष्ट्रिय मान्यता रहेको छ।
थोकरले सन् १९९७ मा नेपाल शोतोकान कराते एसोसिएसन तथा जापान कराते एसोसिएसनबाट प्रथम डान प्राप्त गरेका थिए। त्यसपछि जापान तथा अमेरिकाका विभिन्न अन्तर्राष्ट्रिय कराते संस्थाबाट क्रमशः दोस्रो, तेस्रो, चौथो, पाँचौँ र छैटौँ डान हासिल गर्दै उनले सन् २०२६ मा सातौँ डान प्राप्त गरेका हुन्।
सन् २००७ देखि अमेरिकामा कराते विद्यालय सञ्चालन गर्दै आएका थोकर अमेरिकामा कराते स्कूल स्थापना गर्ने पहिलो नेपालीका रूपमा समेत परिचित छन्। उनले सयौँ विद्यार्थीलाई कराते प्रशिक्षण दिँदै आएका छन् भने विभिन्न राष्ट्रिय तथा अन्तर्राष्ट्रिय कराते प्रतियोगिताको आयोजना र प्रवर्द्धनमा पनि महत्वपूर्ण भूमिका निर्वाह गरेका छन्।
दोलखाको चरिकोटस्थित कालिञ्चोक माध्यमिक विद्यालयबाट एसएलसी उत्तीर्ण गरेका थोकरले उच्च शिक्षाका लागि काठमाडौं आएपछि करातेलाई जीवनको मुख्य साधनाका रूपमा अघि बढाएका थिए। उनी भीम लामा प्रहरी प्रशिक्षण केन्द्रमा समेत कराते प्रशिक्षकका रूपमा कार्यरत रहिसकेका छन्।
चार दशकभन्दा बढी समयदेखि करातेको साधना, प्रशिक्षण र अन्तर्राष्ट्रिय प्रचार–प्रसारमा सक्रिय थोकरको सातौँ डान प्राप्ति नेपाली कराते इतिहासको महत्वपूर्ण उपलब्धिका रूपमा हेरिएको छ। खेलकुद क्षेत्रका व्यक्तित्वहरूले उनको सफलताले अन्तर्राष्ट्रिय मञ्चमा नेपालको प्रतिष्ठा थप उचो बनाएको बताएका छन्।
