काठमाडौं । “भूमि समस्या र समाधानका सवाल” विषयक अन्तरक्रिया कार्यक्रम बुधबार नेकपा (एमाले)को केन्द्रीय कार्यालय च्यासलमा सम्पन्न भएको छ। कार्यक्रम नेकपा (एमाले)को जनसङ्गठन भूमि अधिकार तथा श्रमिक संगठन, नेपालको आयोजनामा भएको हो।
कार्यक्रमको अध्यक्षता संगठनका अध्यक्ष इन्द्र तामाङले गर्नुभएको थियो भने महासचिव उमेश आचार्यले सञ्चालन गर्नुभएको थियो। कार्यक्रममा नेकपा (एमाले)का महासचिव शंकर पोखरेल प्रमुख अतिथिका रूपमा सहभागी हुनुभएको थियो।
कार्यक्रमलाई सम्बोधन गर्दै महासचिव शंकर पोखरेलले नेपालमा अव्यवस्थित बसोबासी, भूमिहीन तथा सुकुम्बासी नागरिकले भोगिरहेका भूमि समस्याबारे आफ्नो स्पष्ट धारणा राख्नुभएको थियो। उहाँले भूमि समस्या समाधानका लागि दीर्घकालीन, व्यवहारिक तथा नीतिगत पहल आवश्यक रहेको बताउनुभएको थियो।
अन्तरक्रिया कार्यक्रममा सहभागीहरूले भूमि व्यवस्थापन, भूमिहीन नागरिकको अधिकार, सुकुम्बासी व्यवस्थापन तथा वर्तमान चुनौतीका विषयमा आ–आफ्ना धारणा र सुझाव प्रस्तुत गरेका थिए। सहभागीहरूले समस्या समाधानका लागि सरकार र सम्बन्धित निकायले प्रभावकारी कदम चाल्नुपर्नेमा जोड दिएका थिए।
आयोजकका अनुसार कार्यक्रमबाट प्राप्त सुझाव तथा निष्कर्षलाई आगामी नीति निर्माण तथा भूमि अधिकारसँग सम्बन्धित अभियानमा उपयोग गरिनेछ। भूमि समस्या समाधानका लागि सरोकारवाला पक्षबीच निरन्तर संवाद र सहकार्य आवश्यक रहेको निष्कर्ष पनि कार्यक्रममा निकालिएको थियो।
