काठमाडौं । केन्द्रीय सत्ता समीकरण परिवर्तनसँगै बागमती प्रदेश सरकारबाट बाहिरिने तयारीमा रहेको नेकपा एमालेले तत्कालका लागि आफ्नो निर्णय स्थगित गरेको छ। सोमबार बिहान काठमाडौंको कोटेश्वरमा बसेको एमाले बागमती प्रदेश संसदीय दलको बैठकले पार्टीको केन्द्रीय नेतृत्वबाट स्पष्ट निर्देशन नआएसम्म सरकार नछाड्ने निष्कर्ष निकालेको हो।
यसअघि एमालेले सरकारलाई दिएको समर्थन फिर्ता लिँदै सरकारमा रहेका आफ्ना मन्त्रीलाई सामूहिक राजीनामा दिन निर्देशन दिएको थियो। संसदीय दलका नेता जगन्नाथ थपलियाले आइतबार साँझ मुख्यमन्त्री इन्द्रबहादुर बानियाँलाई सरकारबाट बाहिरिने जानकारी गराइसकेको बताएका थिए। तर पछिल्लो राजनीतिक घटनाक्रमपछि तत्काल राजीनामा नदिने निर्णय गरिएको हो।
कृषि, पशुपन्छी, वन तथा वातावरण मन्त्री मधुसुदन पौडेलले पार्टीको माथिल्लो तहबाट कुनै औपचारिक निर्देशन प्राप्त नभएको स्पष्ट पार्दै सञ्चारमाध्यममा आएका राजीनामासम्बन्धी समाचारलाई आधारहीन बताएका छन्। उनले निर्देशन प्राप्त भएपछि मात्रै पार्टीको निर्णयअनुसार अघि बढ्ने बताए।
उनका अनुसार बैठकमा पार्टी सचिव महेश बस्नेत पनि सहभागी थिए। केन्द्रमा वर्तमान गठबन्धनका विषयमा छलफल जारी रहेकाले प्रदेश सरकारका सम्बन्धमा तत्काल कुनै निर्णय नगरिएको जानकारी बैठकमा दिइएको थियो।
मन्त्री पौडेलले अहिले पनि बागमती प्रदेशमा नेपाली कांग्रेससँगको गठबन्धन औपचारिक रूपमा कायम रहेको बताए। मन्त्रालय पुनर्संरचना, बिना विभागीय मन्त्रीको जिम्मेवारी तथा सरकारको भावी स्वरूपबारे एक–दुई दिनभित्र थप स्पष्टता आउने अपेक्षा गरिएको उनको भनाइ छ।
